Yumurta Beyni Qoruyur? – ABŞ Alimlərindən Maraqlı Kəşf

Yaşlı insanlar həftədə ən azı bir dəfə yumurta qəbul etdikdə Alzheimer xəstəliyi ilə qarşılaşma ehtimalı azalır. Bu nəticəyə ABŞ alimləri minə yaxın insan üzərində apardıqları müşahidələr əsasında gəliblər. Tədqiqat “The Journal of Nutrition” (JN) jurnalında dərc olunub.

Tədqiqata Çikaqodakı Rush Memory and Aging layihəsinin 1024 iştirakçısı cəlb olunub. Layihə yaşlanma və yaddaş problemlərini araşdırır. Bütün iştirakçılar müşahidələrin başlanğıcında demensiya xəstəliyi daşımırdılar və keçən il ərzində qida rasionları barədə ətraflı anket doldurmuşdular. Onlar yumurta qəbul etmə tezliyinə görə qruplara bölünüblər — ayda bir dəfədən az, həftədə iki və daha çox dəfə və s. Orta hesabla tədqiqat yeddi il davam edib.

Məlum olub ki, həftədə ən azı bir dəfə yumurta yeyən şəxslərdə Alzheimer diaqnozunun qoyulma riski, ayda bir dəfədən az yeyənlərlə müqayisədə təxminən iki dəfə azdır. Bu nəticələr yaş, təhsil səviyyəsi, fiziki fəallıq və genetik meyillilik kimi digər faktorlar nəzərə alınandan sonra da əhəmiyyətli qalıb.

Bundan başqa, 578 iştirakçı dünyasını dəyişdikdən sonra elmi tədqiqatlar üçün beyin toxumasını hədiyyə edib. Analiz göstərib ki, müntəzəm yumurta yeyənlərin beynində Alzheimer xəstəliyinə xas olan amiloid lövhəcikləri və tau zülalları kimi dəyişikliklər daha az müşahidə olunub.

Tədqiqatçılar yumurtadakı xolin maddəsini bunun mümkün səbəbi hesab edirlər — bu maddə beynin işləməsi üçün vacibdir. Xolin asetilxolin sintezində iştirak edir, bu neyromediator yaddaş və öyrənmə ilə bağlıdır. Həmçinin, hüceyrə membranlarının bütövlüyü üçün vacibdir. ABŞ-da xolinin əsas mənbəyi yumurtadır. Analiz göstərib ki, yumurta qəbulunun təxminən 40%-lik müsbət təsiri məhz qidadakı xolinin yüksək səviyyəsi ilə bağlıdır.

Müəlliflər əlavə tədqiqatlar, o cümlədən klinik sınaqlar aparılmasının vacib olduğunu bildirirlər ki, yumurtanın Alzheimer riskinə təsiri dəqiq müəyyən olunsun. Əgər əlaqə təsdiqlənərsə, yaşlıların beyin sağlamlığını qorumaq üçün yumurta qəbulunu tövsiyə edən qida rasionlarına daxil etmək olar.

Ulusum.az