Böyük Britaniya qalmaqallı miqrantı Ətiyopiyaya deportasiya etdi

Böyük Britaniya səlahiyyətli orqanları qanunsuz miqrasiya yolu ilə ölkəyə daxil olmuş və bir sıra qalmaqallara səbəb olmuş Ətiyopiya vətəndaşı Haduş Kəbatunu deportasiya edib.

Kəbatunun adı üç dəfə medianın gündəminə düşüb: ölkəyə daxil olduqdan cəmi bir həftə sonra azyaşlıya qarşı təcavüzə görə həbs edilməsi, ötən həftə səhvən həbsxanadan azad olunması və nəhayət, deportasiya zamanı ona verilən 500 funt sterlinqlik təzminat səbəbindən.

Böyük Britaniyanın Daxili İşlər Nazirliyi çərşənbə günü bəyan edib ki, Kəbatu çərşənbə axşamı axşam saatlarında təyyarəyə mindirilib və səhər saatlarında Ətiyopiyanın paytaxtı Addis-Abebaya çatıb. Deportasiya zamanı onu beş müşayiətçi müşahidə edib.

Rəsmi məlumata görə, Kəbatunun deportasiya zamanı müqavimət göstərib prosesi pozacağı ilə hədələməsi səbəbindən ona 500 funt sterlinq (təxminən 660 dollar) ödənilib.

Ulusum.az xəbər verir ki, BBC-nin müxbiri Daniel Sendfordun verdiyi məlumata əsasən, Ətiyopiyada polis Kəbatunu qısa müddətlik saxlayıb, lakin barəsində hər hansı cinayət işi olmadığından sərbəst buraxıb.

Haduş Kəbatu 29 iyun tarixində La-Manş boğazı vasitəsilə qeyri-qanuni yollarla İngiltərəyə daxil olmuşdu. Öz bəyanatında o, Liviya, İtaliya və Fransa üzərindən keçərək Britaniyaya çatdığını bildirmişdi. Hazırda onun ölkəsinə qayıtması ilə bağlı proses yekunlaşıb.

Ulusum.az