Taşkentdə “Beş Qazan”da doğmalıq dadı – Özbek aşının qardaşlıq süfrəsi

Sərgi xəbərini eşidən Taşkentdə yaşayan həmvətənlərimiz bizi məşhur “Beş Qazan” restoranında ənənəvi özbək aşı ilə qonaq etdilər. Bu qarşılanma təkcə yemək süfrəsi deyil, doğmalıq, qardaşlıq və mədəni bağların təntənəli nümayişi idi.

Sərgidəki yorğunluğu unudacaq qədər isti münasibət gördük. “Beş Qazan”da süfrəyə təqdim olunan özbək aşı əsrlərdir Orta Asiya mətbəxinin incisi hesab olunur.
Ət, noxud, kök və zəngin ədviyyatlarla hazırlanan bu ləzzət, bir tərəfdən özbək mətbəxinin zənginliyini, digər tərəfdən isə qədimdən bəri bölgədə yaşanan mədəni harmoniyanı əks etdirir.

Qeyd etməyə dəyər ki, “Beş Qazan” sadəcə restoran deyil, həm də mədəni bir məkandır.

Burada təkcə ləzzətli yeməklərlə deyil, özünəməxsus təndir çörəkləri, 5 nəhəng qazanda eyni anda bişən aş və mətbəxə xas təbii atmosferlə tanış olursan.

Bu görüş həm də milli yemək zövqünü və mədəni yaxınlığı əks etdirirdi.

“Beş Qazan”a doğru yol aldığımız anda Taşkentin səmasında parlayan televiziya qülləsi gecənin sakitliyində bələdçimizə çevrildi. Göz oxşayan işıqlandırması ilə uzaqdan şəhəri seyr edən bu qüllə, sanki bizi həmin unudulmaz məkana, özbək aşının mərkəzinə dəvət edirdi

Qaranlıq gecədə parıldayan bu memarlıq incisini seyr etmədən “Beş Qazan” təcrübəsini tam yaşamaq mümkün deyil. İşıqlar içində yolumuzu işıqlandıran qüllə, bu səfərin simvolik və emosional bir hissəsinə çevrildi.

Qəriblikdə bu qədər doğmalıq, bu qədər isti münasibət yaşadan azərbaycanlı soydaşlarımıza sonsuz təşəkkür edirik. Onların qürbətdə belə qardaşlıqla dolu davranışı bizə Vətən nəfəsini hiss etdirdi. Taşkent səfəri təkcə bir sərgi deyil, eyni zamanda mədəni və mənəvi bağlarımızın gücünü hiss etdiyimiz unudulmaz bir yolçuluq oldu.

Əvvəllər özbək plovu pambıq yağında bişirilərdi. Bu yağ həm dad, həm də ənənəvi qoxusu ilə seçilirdi. Lakin son illər pambıq yağı tapmaq çətinləşdiyindən, hazırda əsasən günəbaxan və ya zeytun yağı ilə hazırlanır.

Bu dəyişiklik özbək aşının ruhunu dəyişməsə də, klassik hazırlama üsullarına olan nostaljini artırır.

“Beş Qazan”da keçirilən bu görüş yalnız bir yeməklə məhdudlaşmadı. Ulusum.az xəbər verir ki, qonaqpərvərlik, səmimi söhbətlər və paylaşım bizə qərib ölkədə deyil, öz evimizdə olduğumuzu hiss etdirdi. Əziz soydaşlarımızın bu diqqəti, mədəniyyətimizi yaşatma istəyi və birliyə verdikləri dəyər bizi dərindən təsirləndirdi.

Uzaqda – başqa bir ölkədə belə doğma hisslər yaşadan, mədəniyyətimizi, sənətimizi və ürək birliyimizi paylaşan hər bir azərbaycanlıya sonsuz təşəkkür edirik. Taşkentdəki bu plov süfrəsi, yalnız ləzzətli yeməklə deyil, qardaşlıq və birliyə verdiyi töhfə ilə də yadda qaldı.