ABŞ-da oğurluq kredit kartları ilə 31 min dollarlıq ət sifariş etdi

New York Post yazır ki, Kaliforniyanın Paradaiz şəhərində yaşayan 51 yaşlı Xuan Yepes-Qarsiya oğurluq mal saxlamaqda ittiham olunaraq saxlanılıb.

Polis onun evində dəyəri 31 min dollardan çox olan ət məhsulları aşkarlayıb. İstintaqın məlumatına görə, həmin məhsullar oğurlanmış kredit kartları vasitəsilə sifariş olunub.

Məlumata əsasən, kişi topdansatış təchizatçısından bir neçə böyük sifariş verib və mallar müəyyən ünvana çatdırılıb. Detektivlər məhz həmin ünvanda sənaye tipli dondurucular və üzərində topdansatış etiketləri olan qutularla dolu oğurluq ət aşkarlayıblar.

Yepes-Qarsiya polislərə malların qanunsuz yolla əldə edildiyini etiraf edib. Əti daşıyan sürücünün isə əməliyyatdan xəbərsiz olduğu müəyyən edilib və ona qarşı ittiham irəli sürülməyib.

Polis hazırda təchizatçı şirkətlə birlikdə işləyərək oğurlanmış məhsulların geri qaytarılmasını təmin etməyə çalışır.

Ulusum.az