Ayaq ağrısının günahkarı damarlar deyilmiş?!

Ayaqlarda yaranan sızıldayan ağrının səbəbi təkcə varikoz deyil, bu problem onurğa və ya oynaqlarla bağlı xəstəliklərdən də qaynaqlana bilər. Bu barədə KP.RU saytına fleboloq Aleksandr Belkin məlumat verib. Həkimin sözlərinə görə, bəzən belə simptomlar neyroloji pozuntuların əlaməti də ola bilər.

“Pasiyentlər tez-tez ayaqlarındakı narahatlıqdan şikayət edərək deyirlər ki, varikoz var, damarlar ağrıyır. Amma əslində bir çoxunun ağrısı tamam başqa səbəblərdəndir. Varikoz sadəcə gözə görünən bir problemdir. Amma biz əsas səbəbi axtarmalıyıq,” – deyə Belkin bildirib.

Həkim qeyd edib ki, insanlar özlərinə diaqnoz qoymaq əvəzinə mütləq müayinədən keçməlidirlər, xüsusilə ayaq damarlarının ultrasəs (UŞM) müayinəsini etdirməlidirlər. Çünki əgər problemin kökü damarlarda deyilsə, heç bir kompress çorabı və ya əməliyyat fayda verməyəcək.

Qeyd edək ki, digər fleboloq Kirill Samoxin də daha əvvəl bildirmişdi ki, dayanıqlı şəkildə ayaq üstə işləyən insanlar – fəhlələr, bərbərlər, həkimlər və ofisiantlar – varikoz riski ilə daha çox üzləşirlər. Onun sözlərinə görə, varikozun yaranmasına irsiyyət və damar sisteminə düşən yük də ciddi təsir edir.

Ulusum.az