Arıqladıcı həblərə qarşı Yeni Xəbərdarlıq

Hollandiya Qida və İstehlak Mallarının Təhlükəsizliyi Agentliyi (NVWA), tərkibində qadağan olunmuş və təhlükəli maddələr olan arıqladıcı həblərin internet üzərindən satışına qarşı yenidən xəbərdarlıq edib. Bildirilib ki, bu məhsullar ürək döyüntüsü, ürəkbulanma kimi ciddi yan təsirlərə səbəb ola bilər.

NVWA-nın araşdırmalarına görə, bazardakı arıqladıcı məhsulların əksəriyyəti tərkib etiketlərində göstərilməyən təhlükəli maddələr ehtiva edir. Yoxlanılan 11 müxtəlif markadan 7-də qablaşdırmada qeyd olunmayan qadağan olunmuş maddələr aşkarlanıb.

Analizlər nəticəsində bu həblərin tərkibində sibutramin, sildenafil və emodin kimi qadağan olunmuş maddələrin olduğu müəyyən edilib. NVWA-ya görə, bu maddələr baş ağrısı, ürəkbulanma, qusma və çarpıntı kimi ciddi yan təsirlərə səbəb ola bilər.

NVWA xəbərdarlığında “My Lisaa” adlı arıqladıcı məhsulun bol.com onlayn platformasında və sosial mediada satışı ilə bağlı araşdırma başladığını bildirib. Məhsulun tanıtımının aparıldığı Instagram hesabı bağlanıb və internet mağazasında satışına son qoyulub.

Sonhaber.eu saytının məlumatına görə, NVWA son illərdə bu cür xəbərdarlıqları dəfələrlə yayımlayıb. Bu ilin əvvəlində DynaPills və Meri kapsulları ilə bağlı da oxşar xəbərdarlıqlar edilmişdi. Həmçinin, tərkibində sibutramin olan arıqladıcı çay da yan təsirləri səbəbilə dəfələrlə gündəmə gəlib. 2016-cı ildə bu maddəni ehtiva edən bir çaydan istifadə edən qadının ürək çatışmazlığından dünyasını dəyişdiyi bildirilmişdi.

Ulusum.az