Uşağımı sevmirəmmi? Doğuşdan sonra gələn səssiz boşluq

Doğuş sonrası depressiya (postpartum depressiya) qadınların təxminən 10-20%-də rast gəlinən psixoloji vəziyyətdir. Bu, sadəcə normal doğuş sonrası yorğunluq deyil, dərin və davamlı kədər, ümidsizlik hissi ilə müşayiət olunur. Ən ağrılı tərəflərindən biri də ananın öz uşağına qarşı laqeyd, soyuq münasibət göstərməsi ola bilər.

Niyə belə olur?

Doğuşdan sonra hormon səviyyələrinin kəskin dəyişməsi, yuxusuzluq, fiziki yorğunluq və yeni məsuliyyətlərin ağırlığı ananın psixikasına ciddi təsir edir. Nəticədə, sevgi və bağlılıq hissləri zəifləyə, ancaq bu, ananın uşağı sevmədiyi mənasına gəlmir. Sadəcə o an emosional olaraq yorğun və çaşqındır.

Məsləhətlər:

Hisslərini gizlətmə, paylaş

Duyğularını yaxınlarına, həyat yoldaşına, ya da bir mütəxəssisə açıq danışmaq çox önəmlidir. Bu, hissləri anlamağa və yüngülləşdirməyə kömək edir.

Peşəkar dəstək al

Psixoloq və ya psixiatrla məsləhətləşməkdən çəkinmə. Bəzən terapiya və ya dərman müalicəsi lazımlı olur.

Özünə vaxt ayır

Qısa da olsa, özün üçün vaxt yarat. İstirahət et, sevdiyin kitabı oxu, təmiz havada gəzməyə çalış.

Yuxu rejimini tənzimlə

Yuxusuzluq depressiyanı ağırlaşdırır. Körpənin yuxu rejimini tənzimləmək və ya ətrafdan kömək almaq üçün imkan yarat.

Dəstək qruplarına qoşul

Digər analarla ünsiyyət, təcrübə mübadiləsi və dəstək hissi çox faydalıdır.

Uşağa qarşı mərhəmətli ol

Uşağa sevgi göstərmək bəzən çətin ola bilər, amma kiçik addımlarla başlayaraq əlaqəni bərpa etmək mümkündür. Körpənin gülüşü, toxunuşu vaxtla ruhunu isidəcək.

Unutma, əzizim, doğuş sonrası depressiya müalicə edilə bilən vəziyyətdir. Bu dövrdə ən vacib şey səni anlamaq, səbirli olmaq və kömək almaqdır. Sən güclüsən, və uşağın da sənə möhtacdır. Hər gün kiçik addımlarla irəliləmək – ən böyük qələbədir!

Ulusum.az