Harvard psixiatrı: 50 yaşdan sonra sağlam qalmağın açarı...

50 yaşdan sonra fiziki və psixoloji sağlamlığı qorumağın yolu – Harvard mütəxəssisi izah edir

Harvard Universitetinin psixiatrı Robert Uoldinger bildirib ki, 50 yaşdan sonra fiziki rifahı qorumaq üçün üzgüçülük və gəzintilər, psixi sağlamlıq üçün isə davamlı sosial aktivlik vacibdir. Bu barədə o, Vanitatis nəşrinə müsahibəsində danışıb.

Uoldingerin sözlərinə görə, yetkin yaşda sağlam qalmaq üçün əsas şərt – həyat tərzinin dəyişdirilməsi və fiziki aktivliyə diqqətin artırılmasıdır. O, üzgüçülük, yoqa ilə məşğul olmağı və təzə havada mütəmadi gəzintilər etməyi tövsiyə edib.

Psixiatr sosial əlaqələrin rolunu xüsusilə vurğulayıb – ətrafda etibarlı, açıq və səmimi söhbət edilə biləcək insanların olması vacibdir. Onun fikrincə, insanın həyatında məqsədinin olması da təkliyə qarşı güclü qoruyucudur. Xüsusilə uşaqlar evdən ayrıldıqdan sonra yaranan boşluq hissini bu məqsəd doldura bilər. Bu məqsəd hobbi, könüllü fəaliyyət və ya ictimai layihələrə qoşulmaqla formalaşa bilər.

Sonda, Uoldinger keçmişdəki səhvlər üzərində çox düşünməməyi və həddindən artıq özünü tənqid etməməyin vacibliyini qeyd edib. Onun fikrincə, uğursuzluqları həyatın təbii bir hissəsi kimi qəbul etmək insanın daxili rahatlığı üçün vacibdir.

✍️"Ulusum".az