Toksik münasibətdən çıxmaq niyə bu qədər çətindir?

NEWS.ru-ya danışan psixoloq Yevgeniya Borodinanın sözlərinə görə, qadınlar zorakı münasibətləri tərk edə bilməmələrinin əsas səbəblərindən biri partnyora qarşı dərin emosional bağlılıqdır. O bildirib ki, bu cür münasibətlər həm mənfi, həm də müsbət anların mürəkkəb birləşməsindən ibarətdir və bu da ayrılmanı çətinləşdirir.

“Kənardan baxıldıqda kişi qadını alçaldır və məhv edir, qadın isə dözür və qalır. Lakin qadının özü üçün vəziyyət daha mürəkkəb və çoxqatlıdır,” – deyə psixoloq qeyd edib.

Borodina vurğulayıb ki, toksik münasibətlər birtərəfli olmur — burada müsbət hisslər və sosial amillər də mövcuddur. Qadın kişiyə qarşı emosional bağlılıq hiss edir və bu, müxtəlif duyğularla müşayiət olunur. Bu bağlılıq aşağı özünə qiymət, qurban mövqeyi və keçmiş münasibət təcrübələri ilə daha da güclənir.

Bundan başqa, qadınlar çətin həyat şəraiti səbəbindən də toksik münasibətlərə daxil ola bilərlər. Bu vəziyyət irəlilədikcə və digər faktorlar gücləndikcə, belə münasibətdən çıxmaq daha da çətinləşir.

“Bəzən qadın çətin həyat şəraitinə görə istər bilərəkdən, istərsə də bilmədən məhdudiyyətlərlə razılaşır, daha sonra isə qazlaytinq və zorakı davranışa məruz qalır. Nə qədər dərinə gedərsə, çıxmaq bir o qədər çətin olur,” – deyə Borodina əlavə edib.

Ulusum.az