Kaliforniyada meşə yanğınlarının vurduğu zərərin $250 - $275 milyard arasında olacağı bildirilib

Kaliforniyada cənub bölgələrində davam edən meşə yanğınlarının vurduğu zərərin $250 - $275 milyard arasında olacağı bildirilib. Bu barədə məlumatı ABŞ-ın "The Washington Post" nəşri yayıb və mənbə olaraq meteoroloji məlumatlar təqdim edən AccuWeather şirkətinə istinad edib.

İlk olaraq, AccuWeather şirkəti bu yanğınların iqtisadi itkilərinin $135 milyard - $150 milyard arasında olacağını proqnozlaşdırmışdı. Lakin yanğınların miqyası və ziyanların artması səbəbindən bu rəqəm ciddi şəkildə yüksəlib.

Kaliforniya tarixində ən böyük və ən dağıdıcı yanğınlardan biri olan bu hadisələr, Pasifik-Paliseyds və Altadina kimi bölgələrdə 12 mindən çox tikilinin yanmasına səbəb olub. Bu bölgələrdəki bəzi ən bahalı daşınmaz əmlaklar, xüsusilə Santa-Monika ilə Maliybu arasındakı ərazilərdə, orta qiyməti $2 milyon olan evlər də yanıb.

Baş meteoroloq Conatan Porter bu hadisələri Kaliforniya tarixindəki ən pis meşə yanğınları olaraq qiymətləndirib.


Səidə Mustafa