Üzeyir Hacıbəyli XVII Beynəlxalq Musiqi Festivalı başlayır

Sentyabrın 18-də ölkəmizdə Azərbaycan professional musiqisinin banisi, dahi bəstəkar Üzeyir Hacıbəyliyə ithaf olunmuş XVII Beynəlxalq Musiqi Festivalına start veriləcək.

Festival Heydər Əliyev Fondu və Mədəniyyət Nazirliyinin təşkilatçılığı, həmçinin Türk Mədəniyyəti və İrsi Fondu ilə ICESCOnun dəstəyi ilə həyata keçirilir və sentyabrın 28-dək davam edəcək.

Bakı, Sumqayıt, Şuşa, Gəncə, Ağcabədi, Naxçıvan və Qazaxda keçiriləcək tədbirlər çərçivəsində musiqi sevərlər möhtəşəm konsertlərin, teatr tamaşalarının, sərgilərin, elmi simpoziumların və ustad dərslərinin şahidi olacaqlar.

Festival həm də beynəlxalq mədəniyyət körpüsünə çevriləcək – səhnədə yalnız Azərbaycan musiqiçiləri deyil, həm də Türkiyə, ABŞ, Almaniya, Fransa, İsveçrə, Koreya və daha bir çox ölkədən gələn tanınmış ifaçılar və musiqişünaslar çıxış edəcəklər.

Bu festival sadəcə musiqi hadisəsi deyil – bu, Üzeyir Hacıbəylinin mirasına, Azərbaycan musiqisinin gücünə və dünyaya açılan səsinə ehtiramdır.

Ulusum.az