Rəhbərlər, həkimlər, işsizlər… Araşdırma xəyanətin gizli səbəblərini üzə çıxardı

Kişilərin xəyanəti mövzusu tez-tez emosiyalarla müzakirə olunsa da, səbəblər çox vaxt xarakterdən deyil, həyat tərzindən qaynaqlanır. Son araşdırmalar göstərir ki, bəzi peşə sahibləri — rəhbərlər, həkimlər, sığorta agentləri, hətta işsiz kişilər də xəyanət siyahısında daha çox yer alırlar. Burada məsələ peşənin “insanı korlamasında” deyil, onun yaratdığı şəraitdədir: stres, cazibələr, resurslara çıxış və ya əksinə, özünəinam böhranı. Psixoloq Radmila Bakırova xəyanəti artıran əsas amilləri izah edib.

Yüksək vəzifələr və “hər şeyə icazə var” hissi

Rəhbər vəzifədə olan kişilər çox vaxt statusun və gücün təsiri ilə özlərini “qaydaların onlara işləmədiyi” xüsusi biri kimi hiss edirlər. Pul, diqqət və cazibə imkanları onları sınayır. Psixoloqlar bunu “ulduz effekti” adlandırır. Belə əlaqələr emosional soyuqluqla seçilsə də, ailədə etimada ciddi zərbə vurur.

Stresli peşələr: həkimlər, sığortaçılar və digərləri

İnsanların həyatına, puluna görə cavabdeh olan və daimi gərginlik içində işləyən kişilər tez-tez peşəkar yanma yaşayır. Çıxış yolu axtaran bəziləri üçün xəyanət sadəcə “gərginliyi azaltmaq” üsulu kimi görünür. Amma bu, problemi həll etmir, əksinə, münasibətləri daha da zədələyir.

İşsizlik və özünəinam böhranı

İşsiz kişilər də daha çox xəyanət edir. Səbəb boş vaxt deyil, özünü dəyərsiz hiss etməkdir. Bu halda xəyanət “mən hələ də cəlbediciyəm” mesajı rolunu oynayır. Lakin nə maliyyə, nə də psixoloji problemləri həll etmir, münasibətləri daha da gərginləşdirir.

Tez-tez səfərlər və ayrılıq

Uzun ezamiyyətlər və səfərlərlə bağlı işlər münasibətlərdə emosional məsafə yaradır. Yeni insanlarla ünsiyyət və anonimlik hissi cazibəni artırır. Güclü münasibətləri olan kişilər belə bəzən bu sınağa tab gətirə bilmirlər. Bu, xüsusilə nəqliyyat, IT və beynəlxalq sahələrdə işləyənlərdə müşahidə olunur.

Kollektiv mədəniyyəti və ətraf mühit

Bəzi peşələr birbaşa təhlükəli olmasa da, kollektivin “normaları” təsir edir. Əgər şirkətdə xəyanət təbii qarşılanırsa, əyləncə və flört mədəniyyətin bir hissəsinə çevrilibsə, bu, əvvəllər belə düşünməyənləri də asanlıqla təsirləndirə bilər. Psixoloqlar deyir ki, insan yaşadığı mühitin qaydalarına qarşı uzun müddət getmir.

Ulusum.az