İş görüşməsində uğursuzluğa aparan səhvlər

Müsahibə sadəcə namizədin monoloqu deyil, qarşılıqlı söhbətdir. Burada həm işəgötürən, həm də iş axtaran tərəf bir-birinə uyğun olub-olmadığını dəyərləndirir. Namizədin verdiyi suallar isə onun hazırlığı, motivasiyası və peşəkarlığı barədə mühüm təəssürat yaradır.

NC Logistic şirkətinin İnsan Resursları şöbəsinin rəhbəri Yuliya Zavalkina “Gazeta.ru”ya açıqlamasında bildirib ki, şirkət barədə açıq mənbələrdən rahatlıqla öyrənilə biləcək məlumatı müsahibədə soruşmaq düzgün deyil – bu, hazırlıqsızlıq təsiri bağışlayır. Əvəzində şirkətin inkişaf strategiyası və layihələri ilə bağlı daha dərin və məqsədyönlü suallar vermək lazımdır.

💼 Maaş və güzəştlər məsələsi

Müsahibəyə dərhal əmək haqqı ilə başlamaq tövsiyə olunmur. Bu, yalnız pulun əsas motivasiya olduğunu göstərə bilər. Ən yaxşısı, işəgötürən mövzunu qaldırdıqdan sonra dəqiqləşdirici suallar verməkdir.

⚠️ Yalnız şəxsi maraqlara fokuslanmaq olmaz

Əgər namizəd ilk dəqiqələrdə tez-tez məzuniyyət, qısa iş günü və ya rahat qrafik barədə soruşursa, bu, onun şəxsi maraqları komandanın məqsədlərindən üstün tutduğunu göstərə bilər. İşəgötürən isə komanda ruhuna sahib işçi axtarır.

🗣️ Şayiələr və neqativ suallar

Şirkət və ya rəhbərlik barədə yayılan mənfi rəyləri müsahibədə soruşmaq etik sayılmır. Bu, dedi-qoduya meyllilik təsiri yarada bilər. Əlbəttə, rəyləri nəzərə almaq olar, amma müsahibə belə mövzular üçün doğru yer deyil.

🙅 Şəxsi həyat barədə soruşmaq olmaz

Müsahibəçi ilə yaxınlıq yaratmaq məqsədilə onun ailə həyatı və şəxsi maraqları barədə suallar vermək peşəkar imici poza bilər. Ən yaxşısı, diqqəti iş mövzularına yönəltməkdir.

✅ Düzgün suallar hansı olmalıdır?

Şirkətdə peşəkar inkişaf və təlim imkanları

Vakansiyanın əsas vəzifələri və məqsədləri

Komanda və korporativ mədəniyyət

Uzunmüddətli perspektivlər və şirkətin gələcək planları

🔑 Müsahibə həm məlumat almaq, həm də özünüzü ən yaxşı tərəfdən göstərmək üçün şansdır. Düzgün seçilmiş suallar isə istədiyiniz işi qazanmaq ehtimalınızı artırır.

Ulusum.az