20-ci əsrin ən məşhur casuslarından biri vəfat edib

Britaniyaya qaçan keçmiş KQB agenti Oleq Qordievski 87 yaşında vəfat edib.

“Ulusum”.az xəbər verir ki, BBC telekanalının verdiyi məlumata görə, Qordievski 20-ci əsrin ən məşhur casuslarından biri sayılır və Oleq Penkovski-dən sonra Sovet İttifaqı kəşfiyyatında ən vacib Britaniya agenti hesab olunur.

Qordievski 23 il boyunca KQB-də çalışıb və 1985-ci ildə Sovet İttifaqının Britaniyadakı rezidenturasının rəhbəri olub. Lakin 1985-ci ilin iyulunda, Britaniya əks-kəşfiyyatı ilə əlaqələrə görə şübhəli bilinərək, Moskvada dindirildikdən sonra SSRİ-dən qaçmağa müvəffəq olub. Onun bu addımı və Mİ6 ilə əlaqələri səbəbindən o, ölüm cəzasına məhkum edilmişdi.

Qordievskinin qaçışı Böyük Britaniyanın Moskvadakı səfirliyi tərəfindən təşkil olunub, o, diplomatik maşının baqaj hissəsində gizlədilərək Britaniyaya gətirilmişdi.

Sovet sistemindən qaçaraq kapitalist dünyasına keçən Qordievski, Stalinin cinayətlərindən xəbərdar olduqdan sonra dünyagörüşünün dəyişdiyini bildirib.

2007-ci ildə isə o, Britaniya tərəfindən Müqəddəs Maykl və Müqəddəs Corc ordeninin cəngavər komandiri təyin olunmuşdu.