Xoruldamaq düşündüyünüzdən daha təhlükəlidir

Əksər insanlar yatarkən xoruldayır. Bəzən bunu maraqlı hadisə kimi qarşılayır, bəzən isə yuxumuzu böldüyü üçün qəzəblə qarşılayırıq.

Ətrafa narahatlıq saçan xorultu həmin şəxsin ıziyyət çəkdiyi xəstəliklərin göstəricisi ola bilər.

Kimlər xoruldayır?

Adətən kişilərdə müşahidə olunur və bunun səbəbi onlarda piylənmənin yuxarı nahiyələrdə, qadınlarda isə aşağı nahiyələrdə əmələ gəlməsidir. Xoruldamaq problemi xüsusilə xəstənin özü deyil, yaxın ətrafı tərəfindən müşahidə edilir.

Ulusum.az alimlərin kişilər üzərində apardığı araşdırmaların nəticəsinə əsasən xəbər verir ki, yumşaq damaq toxuması ilə əlaqəli olan titrəmədən irəli gələn bu problem yumşaq damaq toxumasının yumşalması və mənfi təzyiq yaratması nəticəsində əmələ gəlir.

Xoruldama probleminə səbəb olan amillər:

- Artıq çəki;
- Spirtli içki qəbulu;
- Əzələ gərginliyini bərpa edən dərmanların qəbulu;
- Qeyri-düzgün yastıq seçimi;
- Yuxu pozisiyasının səhv təşkili;
- Allergik rinit və sinusit kimi yuxarı tənəffüs yolları xəstəlikləri;
- Anatomik quruluş, burun əyriliyi.
Bütün bunlar ilk növbədə, yuxu keyfiyyətini aşağı salır, eyni zmaanda səhərlər özünü yorğun hiss etməsinə səbəb olur. Gün ərzində davamlı olaraq yuxu, unutqanlıq və diqqət problemləri ilə üzləşə bilər.

Bundan əlavə, xoruldama insan səhhətində ciddi problemlərə səbəb ola bilər. Məsələn, ürək xəstəliklərinə şərait yaradan xoruldama vücudun tələb etdiyi oksigeni qəbul edə bilməməsi ilə yanaşı, daxili orqanların zədələnməsi ilə də nəticələnə bilər. Yuxu apneası, yəni yuxuda tənəffüsün dayanması diaqnozu müalicə edilməzsə, ciddi sağlamlıq problemlərinə səbəb olmaqla yanaşı, hətta ölümlə belə nəticələnə bilər.

Xoruldama problemi olan xəstələrdə ilk olaraq yuxu apneasının olub-olmaması yoxlanılmalıdır. Bunun üçün xəstəyə yuxu testi edilir. Xəstədə yuxu apneası sindromu aşkar olunmadıqda xəstəyə yalnız xoruldama müalicəsi tətbiq edilir. Xoruldama QBB mütəxəssisləri tərəfindən tətbiq edilən bəzi cərrahi müdaxilələr və radiotezlik tətbiqləri ilə də müalicə tətbiq olunur.

Qeyd edək ki, hazırda bəzi əczəxanalarda xoruldama əleyhinə satılan bəzi vasitələr sadəcə müvəqqəti həll yoludur və onlardan uzun müddətli istifadə tövsiyə edilmir. Problemin köklü şəkildə müalicəsi üçün cərraha müraciət etmək lazımdır.

Aymirə Ağamirova