Nərimanov Rayon İcra Hakimiyyəti bunu niyə GİZLƏDİR? - EKSKLÜZİV

Bakı şəhəri, Nərimanov rayonunun mərkəzi parkı hesab edilən Nərimanov adına istirahət parkı ötən ilin fevralından etibarən təmirə bağlanıb.

Ulusum.az xəbər verir ki, 1 ildən çoxdur, vətəndaşların üzünə hasarlanan parkın taleyi sual altındadır. Nərimanov Rayon İcra Hakimiyyəti ilə əlaqə saxlamağa çalışsaq da, qurumdan heç bir cavab ala bilmədik.

Ümumiyyətlə, şəhərin mərkəzində olan parkın taleyi niyə müəmmalı olsun?

Eyni zamanda metronun “Nəriman Nərimanov” stansiyasının ətrafında yerləşən parkın hasarlanması piyada səkilərini daraldıb, insanların gediş-gəlişinə ciddi narahatlıq törədir. Lakin Nərimanov RİH susmağa üstünlük verir.

Eyni zamanda həmin istiqamətdə avtobusların dayanacaqları yerləşdiyi üçün günün pik saatlarda yol keçilməz olur. Hər gün sözügedən yoldan istifadə edən sakinlər isə bu vəziyyətin nə vaxtadək sürəcəyindən gileylənirlər. Çünki parkın ətrafındakı lövhə və hasarlarda təmirin hansı müddətə qədər davam edəcəyi ilə bağlı heç bir məlumat yoxdur.

P.S. Bir ildən çoxdur yuxarıda qeyd etdiyimiz narahatlıqlar hökm sürməkdədir, artıq təmirli parkda istirahətin vaxtı deyilmi?!

Ağa Dadaşzadə