Dünyanı Sənət Xilas Edəcək – Rənglərin Qardaşlığı Özbəkistanda

2025-ci ilin oktyabr ayında Özbəkistanın mədəniyyət beşiyi olan Daşkənd və Səmərqənd şəhərləri unikal bir sənət hadisəsinə ev sahibliyi etdi.


“Dünyanı Sənət Xilas Edəcək – Rənglərin Qardaşlığı” adlı beynəlxalq plener və sərgi Türk dünyasının yaradıcı ruhunu bir araya gətirdi.


Azərbaycan, Türkiyə, Qazaxıstan və Özbəkistandan olan rəssamlar qədim şəhərlərin ruhunu və mədəni irsini öz fırçaları ilə zamanın rənglərinə çevirdilər.


Açıq havada, tarixin nəfəs aldığı məkanlarda çəkilən etüdlər, sənətkarların qəlbindəki dostluq və harmoniya mesajlarını tablolar vasitəsilə dünyaya çatdırdı.





Azərbaycan və beynəlxalq sənət aləmini layiqincə təmsil edən rəssamlar — Nəvai Mətin, Tofiqə Əliyeva, Sevinc Abbaszadə, İntiqam Cəfərov, Elçin Nəsirov, Məlahət İsmayıl, Sevinç Kərimova, Elanura Mənsimova, Elvin Mənsimov, Könül İsmayılova, Harun Cici, Ziver Kaplan, Köşen Janat, Jumasheva Saule, Khakimjanova Aygul, Ramazanov Ahmed və Chukitayeva Zarina, fərqli texnika və janrlarda ərsəyə gətirdikləri əsərlərlə sənətin birləşdirici və şəfalı gücünü nümayiş etdirdilər.



Plenerin kulminasiya nöqtəsi 21 oktyabrda Özbəkistan Foto Evinin sərgi salonunda baş tutan möhtəşəm sərgi oldu. Bu sərgidə nümayiş olunan əsərlər yalnız vizual sənət nümunələri deyildi, onlar qardaşlıq, barış və yaradıcılıq enerjisinin rəngli manifestinə çevrildi.

Tədbirin geniş kütlələrə çatmasında ULUSUM.AZ və MAGAMEDIA platformalarının rolu böyük oldu.



Xüsusilə, Ulusum.az saytının rəhbəri Rəxşəndə Daşdəmirova, Magamedia şirkətinin rəhbəri Məhəmməd Hətəmov və layihələr departamentinin rəhbəri Könül Hətəmovanın dəstəyi sənətin gücünü cəmiyyətə daha yaxından tanıtmağa xidmət etdi.



Bu layihə bir daha sübut etdi: "sənət millət tanımaz, o, ürəkləri və mədəniyyətləri birləşdirən ən ülvi dildir.



“Dünyanı Sənət Xilas Edəcək”şüarı isə Türk dünyasının yaradıcılıq həmrəyliyinin və ortaq ruhunun rəmzinə çevrildi.



R.Daşdəmirova
Ulusum.az