ABŞ-da dəhşət: 4 ailə üzvü 9 övladlığa götürülmüş uşağa işgəncə verib

ABŞ-ın Florida ştatında 4 nəfərlik ailə – Breyn Metyu Griffet, Cill Elizabet və onların iki bioloji övladı Dallin Rassel və Liberty Enn – 9 övladlığa götürülmüş uşağa qarşı qeyri-insani rəftar səbəbilə 22 iyulda saxlanılıb. Bu barədə Sky News məlumat yayıb.

Polisin açıqlamasına görə, uşaqlar ikiqat çarpayıların altında qurulmuş improvizə olunmuş qəfəsə salınıb, bəzi hallarda Breyn uşaqları dəyənəklə döyüb və iz qoymamağa çalışıb. Onlar uşaqlara oxumağı və yazmağı öyrənməyi qadağan ediblər, həyatları barədə yalan danışmağa məcbur ediblər.

Cəza olaraq üzlərinə sirkə səpilib və ağır ev işləri görməyə məcbur ediliblər. Bu zaman ailənin bioloji övladları işdən azad olunub, oyun oynamaq və televizora baxmaq hüququna malik olublar.

Hazırda şübhəlilər nəzarət altındadır, onlara qarşı ittiham irəli sürülüb. Florida Uşaq və Ailə İşləri Departamenti uşaqları himayəyə götürüb. İstintaq davam edir.

Ulusum.az