Dövlət əleyhinə çağırışlar ittihamı ilə həbs edilən cəbhəçilərin məhkəməsi başlayıb

Bu gün Bakı Ağır Cinayətlər Məhkəməsində Azərbaycan Xalq Cəbhəsi Partiyasının keçmiş üzvləri Gündüz Mirzəyev və Zaur Əsgərovun işi üzrə hazırlıq iclası keçirilib. Onlar Cinayət Məcəlləsinin 281.2-ci maddəsi ilə dövlət əleyhinə yönələn açıq çağırışlar etməkdə ittiham olunurlar.

Məhkəmədə təqsirləndirilən şəxslərin anket məlumatları dəqiqləşdirilib və ilkin dinləmələr aparılıb. Vəkillər müvəkkillərinin ev dustaqlığına buraxılması və şüşə qəfəsdən çıxarılaraq yanlarında əyləşməsinə dair vəsatətlər qaldırıblar. Məhkəmə ev dustaqlığına dair vəsatəti təmin etməsə də, digər vəsatəti qəbul edib. Növbəti iclasda müttəhimlər vəkilləri ilə bir sırada əyləşəcəklər.

İşin baxışı mayın 15-nə təyin edilib. Qeyd edək ki, Gündüz Mirzəyev 2020-ci ildə Milli Məclisdə baş verən basqınla əlaqədar həbs olunmuş, sonradan şərti azadlığa buraxılmışdı. Hər iki şəxs əvvəllər Azərbaycan Xalq Cəbhəsi Partiyasının üzvü olublar.

✍️"Ulusum".az