Süni intellekt imtahanda tələbələri geridə qoydu

İngiltərədəki tədqiqatçılar süni intellektin bəzi imtahanlarda universitet tələbələrindən daha yaxşı nəticə göstərdiyini müəyyən ediblər.
Ulusum.az xəbər verir ki, Reading Universitetinin tədqiqatçıları bakalavr pilləsi üzrə psixologiya imtahanlarında süni intellekt chatbot ChatGPT-dən istifadə ediblər.
Tədqiqatçılar açıq-aşkar suallara cavab verən və məqalələr yazan ChatGPT-nin universitet tələbələrindən yarım bal daha yüksək qiymət aldığını qeyd ediblər.

İmtahanları qiymətləndirən müəllimlər suallara süni intellekt vasitəsilə cavab verildiyini dərk edə bilməyiblər. Universitetlərdə istifadə edilən plagiat proqramları da süni intellektləri aşkar edə bilməyib. Bu proqramlar zamanın yalnız 6 faizində süni intellekt aşkarlaya bilib.

İnsan dilini başa düşmək və onunla ünsiyyət qurmaq üçün nəzərdə tutulan “böyük dil modelləri”nin ortaya çıxması ilə süni intellektdən istifadənin artdığını bildirən tədqiqatçılar, xüsusilə Covid-19 epidemiyasından sonra onlayn imtahanların artdığını xatırladıblar.

Tədqiqatçılar Peter Scarfe və Etienne Roesch qeyd ediblər ki, universitetlərdə üzbəüz imtahanlara qayıtmaq lazım deyil, lakin süni intellektin inkişafına uyğun olaraq təhsil sistemi də dəyişməlidir.

Araşdırmanın nəticələri "Plos One" jurnalında dərc olunub.

Aymirə Ağamirova