Mobil tarif və internet qiymətləri mübahisəyə səbəb oldu - VİDEO

Məncə, Elvin Abbasov kimi gənc mütəxəssislər hələlik Əflatun müəllim kimi bu sahədə illərlə təcrübəsi olan peşəkarlarla debatlarda ehtiyatlı olmalıdır. Əflatun Məmmədov həm beynəlxalq, həm də ana dilimizdə sərbəst və öz elmi savadına tam güvənən bir şəxsiyyətdir. Rabitə və texnologiya sahəsində illərlə protokol və qaydalara əsaslanaraq işləyən bu insan dediklərini hər zaman əsaslandırmağı və sübutlarla çıxış etməyi bacarır.

Qeyd etmək istəyirəm ki, bu fikirlərim kiminləsə tərəf tutmaq niyyəti daşımır. Sadəcə olaraq, Əflatun müəllimin rabitə sahəsində gördüyü işlərə, rəhbərlik etdiyi idarənin əməkdaşlarını bu sahəyə daha dərindən yiyələnməyə təşviq etməsinə və ümumilikdə sahəyə verdiyi töhfələrə nəzər yetirdikdə, onun nə qədər peşəkar və uzaqgörən bir şəxsiyyət olduğu aydın görünür.

Bəli, o indi əvvəlki vəzifəsində olmasa da, insanın təməlinin möhkəm qoyulduğu ibtidai mərhələlər onun gələcək fəaliyyətində də özünü göstərir.
Bu gün “Baku TV”də yayımlanan verilişdə Azad İstehlakçılar Birliyinin sədri Eyyub Hüseynov, internet və yüksək texnologiyalar üzrə ekspert Əflatun Məmmədov, AİKTSA idarə heyətinin sədri Elvin Abbasov və iqtisadçı ekspert Allahverdi Aydın iştirak edərək ölkəmizdə mobil tariflər və internet qiymətləri ilə bağlı müzakirələr aparıblar.

Verilişdə səslənən fikirlər arasında Əflatun Məmmədovun çıxışı xüsusi diqqət çəkib. Onun bu sahədə verdiyi tövsiyələr və təhlillər bu məsələyə daha peşəkar və sistemli yanaşmanın vacibliyini bir daha ortaya qoyur.



Rəxşəndə Daşdəmirova
Ulusum.az