Filtrlərin arxasında itən gerçəklik

Bəzən sosial şəbəkələrdə elə fotolara rast gəlirik ki, insan bir anlıq duruxur: “Bu, həqiqətən tanıdığım adamdırmı?” O qədər filtr, o qədər retuş… sanki zaman geriyə dönüb, 20 il gəncləşib.

Amma güzgü yalan danışmır. Siz hər gün orada öz həqiqi simanızı görürsünüz. Ətrafınızdakılar da sizi olduğu kimi tanıyır. O zaman bu qədər abartılı filtrlərin, dəyişdirilmiş üzlərin məqsədi nədir? Niyə virtual aləmdə başqa, real həyatda isə tamam başqa görünürük?

Bu, sadəcə estetik bir “şəkil oyunu” deyil. Bu, yavaş-yavaş inamımızı yeyən, özümüzə sevgimizi sındıran təhlükəli bir tələdir. “Mükəmməl görünməliyəm” düşüncəsi qadınları dərin bir uçuruma aparır. O uçurumun adı isə özünü bəyənməməkdir.

Unutmayaq ki, gözəllik yaşla məhdudlaşmır. Qırışlar — yaşanmış günlərin imzasıdır. Saçdakı gümüş rəng — həyat təcrübəsinin mükafatıdır. Onları silmək, gizlətmək, yox etmək sanki öz hekayəmizi, illərimizin dəyərini inkar etməkdir.

Filtrli bir şəkil sizə yüz “like” qazandıra bilər. Amma gerçək, səmimi üzünüz — min sevgi qazanır.

Çünki filtrli gözəllik keçicidir, təbii gözəllik isə ürəklərdə iz buraxır. Özümüzü sevək, gerçəyimizi qucaqlayaq!

Ulusum.az