"Pensiya kalkulyatoru”na birinci rübdə 368 min müraciət

2025-ci ilin ilk üç ayında Əmək və Əhalinin Sosial Müdafiəsi Nazirliyinin təqdim etdiyi “Pensiya kalkulyatoru” elektron xidmətindən 368 min dəfə istifadə olunub.

Bu xidmət vətəndaşlara yaşa görə pensiya hüququnun nə vaxt yaranacağı, sığorta stajı, pensiya kapitalı və digər bu kimi vacib məlumatları asanlıqla öyrənmək imkanı yaradır.

İstifadəçilər e.sosial.az portalına daxil olaraq şəxsi hesablarındakı sosial sığorta kapitalına əsasən gələcək pensiya məbləğini də hesablaya bilirlər. 2020-ci ildən istifadədə olan bu e-xidmətə indiyədək ümumilikdə 4,7 milyondan çox müraciət edilib.

Bu rəqəmlər rəqəmsal xidmətlərin vətəndaşlar arasında populyarlığının artdığını və onların pensiya planlamasında daha fəal iştirak etdiklərini göstərir. Xidmətin davamlı təkmilləşdirilməsi isə daha geniş istifadəçi kütləsinə əlçatanlıq imkanı yaradır.

✍️"Ulusum".az