Hormonal Balanssızlıq: Görünməyən Tarazlığın Pozulması

Hormonal balanssızlıq — orqanizmdə həyati vacib funksiyaları tənzimləyən hormonların lazılandan az və ya çox ifraz olunması nəticəsində yaranan tarazlıq pozuntusudur. Bu vəziyyət insanın həm fiziki, həm psixoloji, həm də reproduktiv sağlamlığına ciddi təsir göstərir.

İnsan bədənində hormonların istehsalını və tənzimlənməsini həyata keçirən endokrin sistemə hipofiz, qalxanabənzər, böyrəküstü vəzilər və cinsiyyət vəziləri daxildir.

Bu vəzilər tərəfindən ifraz olunan hormonlar enerji mübadiləsi, yuxu, emosional vəziyyət, böyümə, cinsi yetkinlik, menstrual dövr və bədən temperaturunun sabitliyini idarə edir. Hormonal disbalans isə bu sistemlərin işləməsinə ciddi təsir edərək müxtəlif simptomlarla özünü göstərə bilər.

Əksər hallarda hormonal pozuntu yalnız bir vəzilə məhdudlaşmır. Məsələn, hipofiz vəzisindəki problem qalxanabənzər və ya reproduktiv vəzilərin də funksiyalarını poza bilər. Prolaktin yüksəkliyi sonsuzluqla nəticələnə, tiroid hormonlarının pozulması isə maddələr mübadiləsi və psixoloji duruma təsir edə bilər.

Sağlam Yaşa/ Ulusum.az