Stressin səviyyəsini... diş sapı ilə ölçmək olar?

Amerikalı alimlər gündəlik istifadə edilən adi diş sapını stress ölçən "ağıllı cihaz"a çeviriblər. Bu möhtəşəm yenilik Tafts Universitetində professor Samir Sonkusale və komandası tərəfindən hazırlanıb.

Məlumdur ki, xroniki stress yüksək təzyiq, ürək-damar xəstəlikləri, zəif immunitet və psixoloji problemlərin əsas səbəblərindəndir. Amma onun diaqnozu ya bahalı analizlər, ya da subyektiv anketlərə əsaslanır.

Yeni cihaz isə stress hormonu olan kortizolu salyada analiz edərək real zamanda göstərə bilir. Diş sapının içində yerləşən sensorlar salyanı kapilyar yolla toplayır və kortizolun miqdarını ölçür.

Bu texnologiyada əsas rol oynayan polimerlər molekulyar yaddaşa malikdir – onlar kortizol molekulunun şəklini “yadda saxlayaraq” təkrar tanıya bilir. Bu isə həm prosesi ucuzlaşdırır, həm də sürətləndirir.

Alimlər bildirir ki, bu üsulla təkcə stress yox, şəkər, estrogen, onkoloji və ürək xəstəlikləri üçün də sensorlar hazırlamaq mümkündür – təkcə salyadan istifadə etməklə!

Professor Sonkusale:

“Biz biotexnologiyanı hər evə gətiririk – laboratoriyalara ehtiyac qalmır!”

Hazırda komanda bu cihazı bazara çıxarmaq üçün startap hazırlığına başlayıb.

Ulusum.az