Beynəlxalq axtarışda olan şəxsin ekstradisiyası təmin olunub

Baş Prokurorluğun Mətbuat xidmətinin məlumatı

«Ekstradisiya haqqında» 13 dekabr 1957-ci il tarixli Avropa Konvensiyasının tələblərinə uyğun olaraq Azərbaycan Respublikası Baş Prokurorluğunun vəsatəti əsasında Azərbaycan Respublikasının vətəndaşı Vəliyev Hikmət Xanlar oğlunun ekstradisiyası Ukrayna Baş Prokurorunun Ofisi tərəfindən təmin edilib.

Belə ki, Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsində aparılan ibtidai istintaq zamanı Hikmət Vəliyevin Azərbaycan Respublikası Cinayət Məcəlləsinin 182.4-cü (xüsusilə külli miqdarda əmlak əldə etmək məqsədilə hədə-qorxu ilə tələb etmə) maddəsi ilə nəzərdə tutulmuş cinayət əməlini törətməsinə əsaslı şübhələr müəyyən edilib. Bu səbəbdən onun barəsində təqsirləndirilən şəxs qismində cəlb etmə haqqında qərar qəbul olunaraq beynəlxalq axtarış elan edilmişdi.

Hikmət Vəliyev Ukrayna ərazisində saxlanılıb və Ədliyyə Nazirliyi Penitensiar Xidmətin xüsusi konvoyunun müşayiəti ilə 2025-ci il aprelin 26-da Azərbaycana ekstradisiya edilib.

✍️"Ulusum".az