"Vüsal(-ın) gecəsi"... FOTOLAR

Şəhidliyə aparan yol - Vətən sevgisi

Böyük arzusu hərbçi olmaq, Vətənə layiqli xidmət göstərmək idi. Bu keçici bir həvəs deyildi, zaman keçdi hərbçi oldu, yetmədi, əzmlə çalışaraq Hərbi Ali məktəbə qəbul oldu, "Kəşfiyyatçı" ixtisası üzrə...

Vətənimizin bütün dünyaya öz hünər göstərdiyi günlərdə ən uca zirvə olan Şəhidlik zirvəsinə adını iri hərflərlə yazdı şəhidimiz..
Şəhid kəşfiyyatçı leytenant Vüsal Cəsarət oğlu Muradov

Ulusum.az-ın məlumatına əsasən, 19 may 1999-cu ildə Sumqayıt şəhərində dünyaya göz açıb. Əslən Ağdam rayonundan olan Vüsal hələ uşaq yaşlarından doğma ərazilərimizin işğalı ilə barışmırdı. Bir gün həmin torpaqlarımızın azad olunacağına əmin olan şəhidimiz bunun üçün canından keçməyə hazır idi. Bu niyyəti onu əsl hərbçi kimi yetişməsinə gətirib çıxardı. 2017-ci ildən Heydər Əliyev adına Azərbaycan Ali Hərbi Məktəbində (AAHM) təhsil aldı. IV sinif Kursantı olanda - 2020-ci ilin sentyabrda II Qarabağ müharibəsinin başlaması ilə bağlı "kiçik leytenant" rütbəsi ilə müharibəyə yollandı.
Beləliklə, Ordumuzun kiçik leytenantı Vüsal Muradov Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və ərazi bütövlüyümüzün bərpa olunması üçün başlanan İkinci Qarabağ müharibəsi zamanı Xocavəndin azadlığı uğrunda gedən döyüşlərdə savaşır. Döyüş zamanı xüsusi şücaət göstərir, düşmənə nifrət, Vətənə sonsduz sevgi onun qüdrətinə qüvvət verir, xüsusi əzmkarlıqla döyüşür, bu ruh yüksəkliyini döyüş yoldaşlarına da aşılayır, onların bir an belə inamsızlığa qapılmasına imkan vermirdi. Axı qələbə qazanacağımıza əmin idi, o inanırdı ki, bu dünyada Haqq yerini tapmalıdır, bunun başqa adı yoxdur, Ali Baş Komandanın yerində verilən strateji və taktiki tapşırıqları vaxt itirmədən icra edən hər bir əsgərimiz düşünmədən bir saniyə belə itirmədən onu xüsusi həssaslıqla icra etməyə köklənmişdi. Onlar əmin idilər ki, yalnız bu zaman Qələbə qazanacağıq, qan tökmək bahasına olsa belə... Adı kimi özü, arzuları da nikbin olan Vüsal oktyabrın 29-da Hadrutun azad edilməsi zamanı Şəhadətə yüksəlir... Sumqayıt şəhərinin Şəhidlər Xiyabanında dəfn olunan şəhidimizin başlıca arzusu Vətənimizi azad görmək idi. İndi Vüsalın ruhu şaddır, çünki Azərbaycan tamamilə müstəqilliyinə qovuşdu.

Şəhid ölmür! Yaşayır və yaşadır!
Şəhidlik Vətən, torpaq, böyük amallar uğrunda candan keçmək, özünü bu yolda qurban verərək ömür payını gələcək nəsillərin xoşbəxtliyinə bağışlamaqdır. Vüsal da belə etdi, cismən bizimlə olmasa da, ruhən bizimlədir, bütün Şəhidlərimiz kimi.. Vüsal Muradov Prezident İlham Əliyevin müvafiq sərəncamlarına əsasən, ölümündən sonra "Vətən uğrunda", "Cəsur döyüşçü" və "Xocavəndin azad olunmasına görə" medalları ilə təltif edildi.

Xalqımız bu mərd oğulları heç vaxt unutmur, Şəhid adının çəkilməsi yetər ki uşaqdan tutmuş böyüyə hər kəs adını ehtiramla yad etsin, ruhuna dualar oxusun... Çünki onlar həyatını heçə sayıb, ölümü gözə alıb sinələrini qabağa verərək Vətənin müdafiəsinə qalxan igidlər oldu.

Vüsalsız “Vüsal gecəsi”

Azərbaycan xalqı qədirbilən xalqdır, amma söhbət Şəhidlərimizdən gedərkən bu həssaslıq birə-beş artır, şübhəsiz.
Vətənpərvərlik sadəcə torpaq uğrunda canını fəda etmək deyil, hər kəsin qibtə edəcəyi tərbiyə nümayişidir, axan suları duruldan ən uca məqamdır. Necə ki Vüsal ucaldı...
İndi Vüsalsız "Vüsal gecəsi"nə yığışıb hamı, ailə üzvləri, dövlət məmurları, sənətkarlar, ictimaiyyət nümayəndələri..

Onun 25 illik xatirəsinə həsr olunan “Vüsal gecəsi” adlı bədii ədəbi musiqili gecəsi tədbir iştirakçılarını kövrəltməklə yanaşı həm də qürurlandırdı... Sözügedən tədbirdə ictimaiyyətə vacib mesaj ötürüldü.

"Vüsal gecə"sinin təşkilatçısı Qabil Ədalət şəhidin öz hərbi geyimində səhnəyə çıxdı. Şəhidin anası Kəmalə xanıma yazdığı “Başına dönüm” şeiri ilə çıxış etdi. O, xanımın əlindən tutub səhnəyə çıxararaq, başından qara yaylığı açıb, yerinə xanımlıq rəmzi olan yaşıl kəlağayını örtdü. Cəmiyyətə bir mesaj olan bu addım gurultulu alqışlarla qarşılandı.

Cənnətdəki yaşın mübarək, ŞƏHİDİM!

Aymirə Ağamirova