Qurban Bayramı sevincini paylaşırıq: 4 günlük tətil başladı

Qurban bayramı İslam aləmində ən müqəddəs bayramlardan biri sayılır. Bu bayram hicri təqviminin 12-ci ayı olan Zilhiccə ayının 10-cu günündə qeyd olunur. Qurbanlıq heyvanlara qoyun, inək və ya dəvə daxildir.

İslamın ən müqəddəs bayramı sayılan Qurban bayramı bütün müsəlman ölkələrində təntənə ilə qeyd olunur. Azərbaycan Respublikasının Milli Məclisi tərəfindən 27 oktyabr 1992-ci ildə qəbul edilən “Bayramlar haqqında” qanuna əsasən, Qurban bayramı ölkəmizdə dövlət səviyyəsində qeyd edilir.

Nazirlər Kabinetinin 11 dekabr 2024-cü il tarixli qərarına əsasən, bu il Qurban bayramı 6 və 7 iyun tarixlərində qeyd olunacaq.

AMEA-nın Şamaxı Astrofizika Rəsədxanasının hesablamalarına əsasən, Ay hilalının Azərbaycanda görünməsi ilə Zilhiccə ayının 10-cu günü — Qurban bayramı bu il miladi təqvimlə iyunun 6-na təsadüf edir.

Həmin gün Azərbaycanın bütün məscidlərində bayram namazı qılınacaq. Şəriətə əsasən, qurbanlıq heyvanın kəsilməsi 6 iyundan başlayaraq 3 gün ərzində icra oluna bilər.

Xatırladaq ki, bu il Qurban bayramı ilə əlaqədar olaraq 4 gün — 6, 7, 8 və 9 iyun tarixləri qeyri-iş günləri olacaq.

Ulusum.az