Qaçqın və məcburi köçkünlərin müraciətləri dinlənildi

Aprelin 22-də Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev əvvəlcədən növbəlilik əsasında qəbula yazılmış vətəndaşların müraciətlərini dinləyib və suallarını cavablandırıb.

“Ulusum”.az xəbər verir ki, müraciətlər əsasən işğaldan azad edilmiş ərazilərə Böyük Qayıdış, köçürülmənin prinsipləri, məşğulluqla təminat, müvəqqəti məskunlaşma yerlərində mənzil-məişət şəraitinin yaxşılaşdırılması, kommunal xidmətlər və digər məsələlərlə əlaqədar olub. Komitə sədri Prezident İlham Əliyevin işğaldan azad edilmiş ərazilərin yenidən qurulması istiqamətində verdiyi tapşırıqların uğurla həyata keçirildiyini və vətəndaşların rahat və təhlükəsiz yaşayışının təmin edildiyini bildirib.

Birinci vitse-prezident Mehriban Əliyevanın da bu sahədə tarixi və mədəniyyət abidələrinin bərpasına xüsusi diqqət yetirdiyi vurğulanıb. Qəbulda iştirak edən vətəndaşların müraciətləri qeydə alınıb və onların araşdırılaraq qanunvericiliyə uyğun şəkildə həll ediləcəyi bildirilib.