“Qəhrəmanlar Anası” adlı anım tədbiri keçirilib

Aprelin 12-də şəhid analarının fədakarlığına və qəhrəmanlığına həsr olunmuş “Qəhrəmanlar Anası” adlı anım tədbiri keçirilib.

Tədbir Dövlət Himninin səsləndirilməsi və şəhidlərin xatirəsinin bir dəqiqəlik sükutla yad edilməsi ilə başlayıb.

Tədbirin təşkilatçısı, Aprel döyüşləri şəhidinin anası Ceyran Həsənova çıxışında həmin döyüşlərin şəhid analarının yaddaşında silinməz iz buraxdığını qeyd edib. O bildirib ki, Azərbaycan heç vaxt müharibə istəməyib, amma öz ərazi bütövlüyünü qorumaq üçün haqq savaşına məcbur olub.

Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova şəhid analarına olan dərin ehtiramı ifadə edərək bildirib ki, bu analar da qəhrəmandır. Millət vəkili Aydın Hüseynov isə çıxışında anaların böyütdüyü qəhrəman övladların sayəsində Azərbaycanın şanlı Qələbə qazandığını vurğulayıb.

Tədbirdə şəhid ailələri, qazilər və ictimaiyyət nümayəndələri iştirak ediblər. Çıxış edənlər şəhidlərin unudulmayacağını, onların ailələrinin daim cəmiyyətin diqqətində olacağını qeyd ediblər. (azərtac)