Zəngilanda quruculuq işləri sürətlə davam edir

Uzun illər erməni işğalında qalaraq viran edilən Zəngilan şəhəri azad olunduqdan sonra yenidən qurulur.



“Ulusum”.az xəbər verir ki, Zəngilan şəhəri birinci yaşayış məhəlləsində tikinti işləri sürətlə davam etdirilir və böyük bir hissəsi artıq tamamlanıb.



Məhəllədə 104 ailənin məskunlaşması nəzərdə tutulur, burada 2 və 3 mərtəbəli 12 bina inşa edilir.



Binaların 8-i ikimərtəbəli, 4-ü isə üçmərtəbəli olacaq. Yaşayış məhəlləsində uşaq və idman meydançaları, yerüstü dayanacaqlar, həmçinin elektromobillər üçün enerji doldurma məntəqəsi də tikilir.



Zəngilan şəhərinin təsdiq edilmiş baş planına uyğun olaraq, birinci yaşayış məhəlləsi şəhərin mərkəzi hissəsində yerləşir.



Binalarda modern memarlıq yanaşmaları ilə yanaşı, milli naxışlar da istifadə olunur və günəş panelləri ilə təchiz olunub. İşlərin 80 faizi başa çatıb, qalan işlər tamamlanandan sonra sakinlərin köçü başlanacaq.



Bu layihə Zəngilanın dirçəlməsi və şəhərin gələcək inkişafı üçün mühüm addımdır.



Layihənin həyata keçirilməsi ilə ərazidəki həyat şərtləri yaxşılaşacaq və regiona yeni həyat gətirəcək.



Zəngilanın işğaldan azad edilməsi ilə başlayan bu bərpa işləri, Qarabağın və Şərqi Zəngəzurun gələcək inkişafına zəmin yaradacaq. Cəbrayıl, Qubadlı və Zəngilan rayonlarında Bərpa, Tikinti və İdarəetmə Xidmətinin İctimaiyyətlə əlaqələr şöbəsinin müdiri İlhamiyə Rzayeva bildirib ki, Zəngilan şəhərinin baş planına uyğun olaraq birinci yaşayış məhəlləsinin tikinti işləri həyata keçirilir.