Dövlət qulluqçularının peşə bayramı münasibəti ilə tədbir keçirilib

Bu gün Lənkəran Ağır Cinayətlər Məhkəməsində dövlət qulluqçularının peşə bayramı münasibəti ilə tədbir keçirilmişdir. Tədbiri giriş nitqi ilə açan məhkəmənin sədri Elxan Süleymanov çıxışında bu əlamətdar günün Azərbaycan Respublikasının prezidenti cənab İlham Əliyevin 25 may 2006-cı il tarixli sərəncamına əsasən hər il qeyd olunmasını bildirmiş, bununla əlaqədar kollektivin dövlət qulluqçusu statusunda olan əməkdaşlarını peşə günü münasibətilə təbrik etmiş, onlara fəaliyyətlərində dövlət orqanlarının və dövlət qulluğunun nüfuzunun artırılması, vətəndaşların dövlət orqanlarına və dövlət qulluqçularına etimadının yüksəldilməsi istiqamətində bundan sonra da səylə çalışmağı tövsiyyə edərək, bu çətin, eyni zamanda şərəfli yolda uğurlar arzulamışdır. Məhkəmədə böyük məsləhətçi vəzifəsində işləyən Şahin Hüccətov dövlət qulluqçularının etik davranış qaydaları və prinsipləri mövzusunda çıxış edərək, dövlət qulluqçuları tərəfindən etik davranış qaydalarına əməl olunmasının təmin edilməsi istiqamətində görülən tədbirlərdən bəhs etmiş, ölkə başçısı cənab İlham Əliyevin dövlət qulluqçuları barədə dediyi fikrin hər bir məsul şəxsdə işıqlı yol formalaşdırdığını vurğulamış, çıxışını məhz həmin fikirlərlə yekunlaşdırmışdır.
“Hər bir şəxs bilməlidir ki, dövlət qulluğunda olmaq imtiyaz deyil, məsuliyyətdir, insanlara xidmət imkanıdır”.
Tədbirin sonunda məhkəmənin dövlət qulluğu statusunda olan bir qism əməkdaşına göstərdikləri səmərəli fəaliyyətlə bağlı təşəkkür elan edilmişdir.

Eltun Məmmədov