Mədəniyyət və Medianın Kəsişməsi: Şəfəq Mehrəliyeva ilə Müzakirə

Mədəniyyət Nazirliyinin təşəbbüsü ilə yayımlanan "Danışır Mədəniyyət!" verilişinin bu dəfəki buraxılışı “Mədəniyyət məsələlərinin düzgün kommunikasiyası” mövzusuna həsr olunub.

Verilişin qonağı ADA Universitetinin Kommunikasiya və Rəqəmsal Media proqramının rəhbəri, Medianın İnkişafı Agentliyinin Müşahidə Şurasının üzvü və təcrübəli jurnalist Şəfəq Mehrəliyevadır.

Şəfəq xanım Azərbaycanın ilk və ən qədim xəbər agentliyi olan AZƏRTAC-ı uzun müddət ABŞ-da təmsil edib və jurnalistikada güclü analitik baxışı ilə seçilir. Verilişdə əsas müzakirə mövzusu mediada mədəniyyətin rolu və onun düzgün təqdimatıdır.

Mehrəliyeva qeyd edib ki, mədəniyyətin effektiv şəkildə çatdırılması üçün ilk növbədə mesajın məzmunu və məqsədi dəqiq müəyyənləşdirilməlidir. Daha sonra, bu mesajın hədəf auditoriyası və istifadə olunacaq platformalar seçilməlidir. Məsələn, gənc auditoriyaya çatmaq üçün TikTok və Instagram kimi sosial media platformaları daha effektiv vasitələrdir.

Onun fikrincə, media çox vaxt “headline” (başlıq) və “deadline” (vaxt məhdudiyyəti) prinsipi ilə işlədiyindən, mədəniyyətə geniş yer ayırmaq çətinləşə bilər. Lakin bu sahəyə diqqət yetirilməlidir, çünki mədəniyyət xalqın xoşbəxtliyinin əsas sütunlarından biridir.

BMT-nin son yanaşmasına əsasən, ölkələrin inkişafı artıq yalnız ÜDM (Ümumi Daxili Məhsul) ilə deyil, ümummilli xoşbəxtlik indeksi ilə ölçülür. Bu indeks dörd əsas sütun üzərində qurulub:

1. Cəmiyyətin dayanıqlı və ədalətli sosial-iqtisadi inkişafı;
2. Ətraf mühitin qorunması;
3. Ədalətli idarəetmə;
4. Mədəniyyətin qorunması və təşviqi.

Şəfəq Mehrəliyevanın sözlərinə görə, mədəni-milli kimlik insanın özünü tanımasının əsas təməlidir. “Əgər siz ‘Mən kiməm?’ sualına cavab verə bilmirsinizsə, deməli xoşbəxtliyinizin əsasını tapa bilməmisiniz,” – deyə o bildirib. Məhz bu səbəbdən mədəniyyətin düzgün kommunikasiyası və onun mediada geniş işıqlandırılması zəruridir.


✍ R.İkramlı