AKMAL NUR: “Dünyanı Sənət Xilas Edəcək – Rənglərin Qardaşlığı”: Türk Dünyasında Yaradıcı Körpü VİDEO

2025-ci ilin oktyabrında Özbəkistanın Daşkənd və Səmərqənd şəhərlərində baş tutan beynəlxalq plener və sərgi, sənətin sülh və dostluq mesajını rənglərin sehrli dili ilə bütün dünyaya çatdırdı.

Bu unikal tədbir rənglərin, mədəni irsin və ruhun vəhdətindən doğan harmoniya ilə tamaşaçılara estetik zövq bəxş etdi.


Tədbirin təşkilatçısı - Azərbaycanlı rəssam və beynəlxalq sülh elçisi Nəvai Metin , öz ideyası ilə sənətin insanları və xalqları birləşdirən gücünü yenidən göstərdi.


Onun təşəbbüsü və Ulusum.az media platforması ilə "MagaMedia"MMC-nin dəstəyi sayəsində plener Türk Dünyasının sənətçiləri üçün dostluq və ilham məkanına çevrildi.


Özbəkistan Rəssamlıq Akademiyasının prezidenti, Xalq rəssamı Akmal Nur qonaqları öz qalereyasında səmimiyyətlə qarşıladı.


Onun əsərləri Əlişir Nəvainin “Lisanut-teyr” əsərindəki mənəvi sirləri rənglərlə danışırdı.


Hər quş, hər rəng ləkəsi bir hekayə kimi uçur, Simurq və Hüd-hüdün yolçuluğunu xatırladırdı.


Fırçanın dili burada sözlərdən güclü idi — hər toxunuş ruhlara körpü, hər rəng ümid işığı idi.


Təsəvvüf fəlsəfəsinin incə qatlarını rənglərlə anlatan bu əsərlər insana həyatın mənəvi dərinliyini hiss etdirirdi: eşq, mərifət, tövhid, heyrət və fəna vadilərindən keçən bir ruhun səyahəti kimi.



Xalq rəssamı Akmal Nurun əsərlərində ana nəvazişi, kənd həyatının saf ruhu, ailə dəyərləri və Tanrının insana bəxş etdiyi alın yazısı xüsusi bir duyğu ilə əks olunur. Əlişir Nəvainin sözlərlə anlatdıqlarını Akmal Nur rənglərlə danışır — Haqqın gözəlliyinə aparan səssiz və dərin bir dua kimi.


Tədbirin sonunda Akmal Nurun şəxsən təqdim etdiyi sertifikat bu unudulmaz səfəri ikiqat dəyərli xatirəyə çevirdi.


Səmərqəndin qədim nəfəsi, Daşkəndin müasir ruhu və Türk Dünyasının birləşdirici enerjisi burada bir tablo kimi canlandı.


Bu görüş yalnız sərgi deyildi — sülhün, dostluğun və sənətin qardaşlıq manifesti idi.







Ulusum.az / K.Hətəmova