Dünən, 12:30 0 Sağlamlıq

Burun-dodaq üçbucağında sızanaq sıxmaq – korluğa qədər aparan təhlükə

Burun-dodaq üçbucağı nahiyəsində sızanaqların sıxılması çox təhlükəli fəsadlara, hətta korluğa səbəb ola bilər. Bu barədə “Qazeta.Ru” ilə söhbətində “SM-Kosmetologiya” klinikasının kosmetoloq-dermatoloqu Olqa Andriyanova xəbərdarlıq edib.

Həkimin sözlərinə görə, bir çox insanlar burun-dodaq üçbucağının anatomik cəhətdən təhlükəli zona olduğunu unudurlar.

“Üzün səthi damarları kəllə dibindəki damar strukturları ilə əlaqəlidir. Qan dövranının xüsusiyyətinə görə, burun-dodaq nahiyəsindəki infeksiya sürətlə beyinə yayıla və ağır nəticələrə, o cümlədən korluq və nekroza gətirib çıxara bilər. Yadda saxlayın – üzünüzdə, xüsusilə burun-dodaq üçbucağında sızanaq sıxmaq qəti qadağandır”, – deyə həkim bildirib.

Əgər sızanaq sıxıldıqdan sonra şişkinlik, qızartı, ağrı, qızdırma, keyimə, ürəkbulanma və halsızlıq kimi əlamətlər yaranarsa, dərhal tibbi yardıma müraciət olunmalıdır. Bu halda, iltihabəleyhinə terapiya və infeksiyanın qarşısının alınması üçün tədbirlər görülməlidir.

Andriyanova qeyd edib ki, bu cür ağır fəsadlar daha çox zəif immunitetli insanlarda yaranır. Buna baxmayaraq, riski unutmamaq və bu zonada özbaşına müdaxilədən qaçmaq vacibdir – bu işi yalnız tibbi təhsilli mütəxəssis yerinə yetirməlidir.

Sızanaqların yaranmasının qarşısını almaq üçün isə həkim dəriyə uyğun ev şəraitində qulluq, düzgün təmizləmə, günəşdən qoruyucu kremin vaxtında yuyulması və qidalanmaya diqqət yetirməyi tövsiyə edib. (Çünki şirniyyat və sadə karbohidratlar dəri problemlərinə səbəb olur.)

Həmçinin həkim günəşli iqlimə səyahətdən əvvəl 7–10 gün qabaq ultrasəs təmizliyi etdirməyi və dəri tipinə uyğun günəşdən qoruyucu krem seçməyi tövsiyə edib ki, komedonların (qara nöqtələrin) yaranmasının qarşısı alınsın.

Ulusum.az

Diqqət Çəkənlər