Uşaqlar üçün risk artır: Koksaki virusunun əlamətləri və qorunma yolları

Avropa Tibb Mərkəzinin (EMC) pediatrı Nikita Volkov RT-yə açıqlamasında Koksaki virusunun əlamətləri, müalicəsi, profilaktikası və kimlərin risk altında olduğunu izah edib.

Həkimin sözlərinə görə, Koksaki virusu ən çox "əl-ayaq-ağız xəstəliyi" kimi tanınan enterovirus vezikulyar stomatiti və ya herpangina (vezikulyar faringit) formasında özünü büruzə verir.

Xəstəlik yüksək qızdırma, boğaz ağrısı, ağız selikli qişasında səpgilər və udma çətinliyi ilə müşayiət olunur. Ekzantemalı formasında səpgilər əsasən əllərdə, ayaqlarda və nadir hallarda omba nahiyəsində müşahidə olunur.

Volkov bildirib ki, bəzi uşaqlarda bu virus sadə soyuqdəymə kimi – yüngül burun axıntısı və azca temperaturla keçə bilər.

Koksaki virusuna qarşı spesifik müalicə mövcud deyil. Simptomatik müalicə tətbiq olunur: qızdırmasalıcı, ağrıkəsici dərmanlar, istirahət və bol maye qəbulu tövsiyə edilir.

Əsas profilaktika üsulu isə gigiyena qaydalarına riayət etməkdir — xüsusilə əllərin mütəmadi yuyulması.

Həkim əlavə edib ki, virusa yoluxma riski daha çox kiçik yaşlı uşaqlarda, immuniteti zəif olanlarda və xəstələrlə sıx təmasda olan böyüklərdə müşahidə olunur.

Ulusum.az