Demə, pəhriz çörəkləri fast-food sayılırmış

Moskvada yerləşən məşhur Sklifosovski adına Elmi-Tədqiqat İnstitutunun həkimləri təcili əməliyyatla bir qadının mədəsində yaranmış "fitobezoar"ı — yəni bitki liflərindən ibarət bərk topanı — çıxarıblar. Səbəb? Qadının demək olar ki, hər gün pəhriz çörəkləri yeməsidir.

Şikayətləri — ürəkbulanma və mədədə ağırlıq olan qadın müayinə zamanı təəccübləndirici nəticə ilə qarşılaşıb. Mədəsində yığılan lif və sellülozlar topa halına düşərək fitobezoar əmələ gətirib.

Dietoloq Mariyat Muxina xəbərdarlıq edib ki, pəhriz çörəkləri düşündüyümüz qədər günahsız deyil. Onlar çox vaxt yüksək temperaturda hazırlanır və bu zaman, çips və digər qızarmış məhsullarda da rast gəlinən "akrilamid" adlı kanserogen maddə əmələ gəlir. Bu maddə bədəndə hüceyrələrə zərər verə, hətta bağırsaqlarda şişlərə səbəb ola bilər.

"Pəhriz çörəkləri əslində fast-food sayılır. Onları yalnız həftədə 1-2 dəfə yemək məsləhətdir. Açığı, adi çörək bir çox hallarda daha təhlükəsizdir", — deyə mütəxəssis bildirib.

Ulusum.az