Beyin və ürəyin yaşlanması arasında əlaqə

Melburn Universitetinin alimləri müəyyən ediblər ki, yaşlandıqca ürək-damar sisteminin işi pisləşir və bu da beynin avtomatik sinir sistemini tənzimləyən sahələrinin fəaliyyətinə təsir edir. Bu, neyrodegenerativ xəstəliklərin inkişafı riskini artırır. Tədqiqatın nəticələri Journal of Neuroscience (JN) jurnalında dərc edilib.

Alimlər ilk dəfə vizuallaşdırma metodlarından istifadə edərək, ürək və beyin arasında həyat boyu necə qarşılıqlı əlaqə olduğunu göstəriblər. Araşdırmada 46 ilə 80 yaş arasında olan 3 minə yaxın sağlam yetkin insan iştirak edib.

Alimlərə əvvəllər məlum olub ki, ürək və beyin bir-biri ilə əlaqəlidir — beyin ürəyin fəaliyyətini tənzimləyir, ürək isə beyni qan və oksigenlə təmin edir. Lakin hələ də bu orqanların xəstəliklərinin niyə birgə inkişaf etdiyi tam başa düşülmür.

Yeni tədqiqat göstərdi ki, ürək-damar sisteminin pis vəziyyəti beyin xəstəlikləri üçün risk amilidir. Alimlər həmçinin müəyyən ediblər ki, ürək və damarları möhkəmləndirən müntəzəm kardio məşqləri, demensiya və Parkinson xəstəliyi kimi xəstəliklərin riskini azaldır.

Tədqiqatçılar ürək-damar sisteminin yaşlanması ilə beynin hansı sahələrinin dəyişdiyini müəyyən etmək üçün multi-orqan vizuallaşdırma texnologiyasından və geniş təhlildən istifadə ediblər. Bu sahələr, avtomatik sinir sistemini və ürəyin fəaliyyətini tənzimləyən mühüm neyron şəbəkələri ilə əlaqəlidir.

Melburn Universitetinin əməkdaşı Yalda Amirmoezzi qeyd edib ki, yeni məlumatlar yaşlanma prosesində ürək-damar və beyin xəstəliklərini proqnozlaşdırmaq və müalicə etmək üçün daha səmərəli strategiyaların hazırlanmasına kömək edə bilər.

Səidə