Modanın imperatoru bu villada cəmi bir gecə qalmışdı – Malikanə milyonlara satıldı - FOTO

Fransız moda evi Chanel-in onilliklər boyunca bədii rəhbəri olmuş alman dizayner Karl Lagerfeld 2019-cu ildə Parisdə vəfat etmişdi.



LAGERFELD “PARİS KƏNARINDAKİ VİLLA”Nİ 2010-CU İLDƏ ALMIŞDI



“Modanın imperatoru” kimi tanınan Lagerfeld, Parisdən təxminən 20 kilometr uzaqlıqda, Yvelines bölgəsinin Louveciennes qəsəbəsində yerləşən və “Paris kənarındakı villa” adlandırdığı bu evi 2010-cu ildə satın almışdı.

20 dönümlük yaşıllıq sahədə yerləşən, 600 kvadratmetr sahəsi olan bu villaya Lagerfeldin ölümündən sonra baxılmayıb və bina tərk edilib. 2023-cü ildə bir əmlak şirkəti tərəfindən alınaraq bərpa olunub.

50 MİN AVRO ARTIMLA SATILDI



Üzgüçülük hovuzu və tennis kortu da olan villa bu ilin iyul ayında 4 milyon 635 min avroya açıq artırmaya çıxarılıb. Evə bir neçə təklif verilsə də, nəhayət, ilkin qiymətdən cəmi 50 min avro çox – yəni 4 milyon 685 min avroya (təxminən 5,5 milyon ABŞ dolları) satılıb.

CƏMİ BİR GECƏ QALMIŞDI

19-cu əsrə aid olan bu tarixi bina vaxtilə ov köşkü kimi istifadə olunmuş və fransız şair Leconte de Lisle də burada yaşamışdı. Fransız mətbuatının yazdığına görə, Lagerfeld bu evdə cəmi bir gecə yatıb. Onun üçün bu məkan əsasən rəsmi qəbul mərasimləri üçün nəzərdə tutulmuşdu. O, Monako şahzadəsi Karolin üçün burada möhtəşəm bir ziyafət təşkil etmiş və evi dostlarına da istifadəyə vermişdi.



Hazırda boş olan evin bütün mebelləri Sotheby’s tərəfindən ayrı-ayrılıqda hərracda satışa çıxarılıb.



Ulusum.az