Kral gəlininə plagiat şoku – kiçik İspan şəhəri böyük brendi ifşa etdi

Sasseks hersoqu Şahzadə Harri, həyat yoldaşı Meqan Marklın "As Ever" adlı brendinin uğurundan qürur duyduğunu bildirib. O, bu barədə People jurnalına verdiyi müsahibəsində danışıb:

"Mən həyat yoldaşım üçün çox xoşbəxtəm və onun etdiklərini və etməyə davam etdiklərini tam şəkildə dəstəkləyirəm. Onunla inanılmaz dərəcədə qürur duyuram", – deyə kral III Çarlzın kiçik oğlu vurğulayıb.

Fevral ayında Meqan Markl qızı Lilibetlə birgə brendinin reklam kampaniyasında çəkilib. Bu brend mürəbbə və ev əşyalarının satışı ilə məşğuldur. Sasseks hersoginyası rebrendinqdən sonra saytın yeni dizaynını təqdim edib. Ana səhifədə Kaliforniya mənzərələri və qızı ilə birlikdə nadir bir foto yer alıb.

Lakin yaxın günlərdə Meqan Marklın brendi Majorqadakı Porreras bələdiyyəsinin gerbini plagiat etməkdə ittiham olunub. Fərq yalnız quşlardadır: hersoginyanın loqosunda Şahzadə Harrinin sevdiyi kolibrilər təsvir olunub.

Porrerasın meri Fransiska Mora bu məsələ ilə bağlı açıqlama verib:

"Plagiat ittihamı ilə məhkəməyə vermək çətin və bahalıdır. Bizim kimi kiçik bir bələdiyyə İngiltərə tacı ilə mübarizə apara bilməz. Əvvəlcə bunu zarafat kimi qəbul etdik, çünki haradan çıxdığını və məqsədin nə olduğunu başa düşmədik", – deyə o bildirib.