Alimlər: tərəvəzlərdəki zeaksantin xərçəng hüceyrələrinə qarşı güclü silahdır

Cell Reports Medicine jurnalının məlumatına görə, Çikaqo Universitetinin alimləri tərəvəzlərin tərkibində olan zeaksantin adlı bioaktiv maddənin güclü antixərçəng təsirinə malik olduğunu müəyyən ediblər.

Eksperiment göstərib ki, zeaksantin şiş hüceyrələrini tanıyıb məhv edə bilən immun hüceyrələrinin (CD8+ T-limfositlərin) aktivliyini artırır.

Çikaqo Universitetinin professoru Cin Çen qeyd edib:
“Biz təəccüblə aşkar etdik ki, indiyə qədər göz sağlamlığında rolu ilə tanınan zeaksantin əslində tamamilə yeni funksiyaya malikdir — o, şişlərə qarşı immuniteti gücləndirir. Sadə qida komponenti müasir xərçəng müalicə metodlarını, o cümlədən immunoterapiyanı tamamlayıb gücləndirə bilər.”

Maddənin təsiri melanoma, glioblastoma və çoxsaylı mieloma xəstəliklərində nümayiş olunub. Zeaksantin CAR-T hüceyrə müalicəsi də daxil olmaqla immunoterapiya nəticələrini yaxşılaşdırıb. Alimlər hesab edirlər ki, bu təsir insanlarda da müşahidə ediləcək.

Mütəxəssislərin sözlərinə görə, zeaksantin xüsusilə bolqar bibərində, göy soğanda, qarğıdalı və qarğıdalı ununda, kələmdə, rukkola, ispanaq və digər yaşıl salatlarda çox olur.

Ulusum.az