Alimlər uzunömürlülüyün sirrini açıqladı — qan analizlərində gizlənib

Science Alert jurnalının məlumatına görə, İsveçdə aparılan genişmiqyaslı tədqiqat uzunömürlü insanların qan analizlərində diqqətçəkən oxşarlıqları üzə çıxarıb.

Araşdırmaya 64–99 yaş arası 44 min isveçli cəlb olunub və iştirakçılar 35 il ərzində izlənilib. Nəticədə iştirakçıların 1224 nəfəri (2,7%) 100 yaşına qədər yaşayıb. Onların böyük əksəriyyətini qadınlar təşkil edib.

Alimlər qan şəkəri, xolesterin, böyrək və qaraciyər funksiyaları, iltihab göstəriciləri də daxil olmaqla 12 biomarkeri təhlil ediblər.

Məlum olub ki, 100 yaşına çatanlarda artıq 60 yaşlarından etibarən qan şəkəri (qlükoza), böyrək funksiyasını göstərən kreatinin və sidik turşusu səviyyələri daha aşağı olub. Bu qrupda çox yüksək və ya həddən artıq aşağı dəyərlərə demək olar ki, rast gəlinməyib.

Yaşam tərzi və qidalanma ön planda

Araşdırma göstərib ki, qan dəyərlərindəki disbalans ömrü qısaldır.

Xolesterin və dəmir səviyyəsi çox aşağı olanlarda uzun yaşamaq ehtimalı azalıb.

Yüksək qan şəkəri, kreatinin və sidik turşusu səviyyəsi isə ölüm riskini artırıb.

Məsələn, sidik turşusu səviyyəsi ən aşağı olan qrupun 4%-i, ən yüksək olan qrupun isə cəmi 1,5%-i 100 yaşına qədər yaşayıb.

Mütəxəssislərin sözlərinə görə, nəticələr genetik amillərlə yanaşı, qidalanma və yaşam tərzinin də uzunömürlülükdə mühüm rol oynadığını ortaya qoyur.

Ulusum.az