AKİA sədri Camalov Ağsuda vətəndaşları dinlədi, təsərrüfatlara baxış keçirdi

Aqrar Kredit və İnkişaf Agentliyinin (AKİA) sədri Yalçın Camalov, Azərbaycan Respublikasının kənd təsərrüfatı naziri Məcnun Məmmədovun əmri ilə, 11 aprel tarixində Ağsu Dövlət Aqrar İnkişaf Mərkəzində Ağsu və ətraf rayonlardan olan vətəndaşları qəbul edib.

Qəbul zamanı vətəndaşların əsas müraciətləri subsidiyaların ödənişi, kənd təsərrüfatı təyinatlı kreditlərin verilməsi və müasir suvarma sistemlərinin alınması ilə bağlı olub. Yalçın Camalov hər bir müraciəti diqqətlə dinləyib və məsələlərin qanunvericiliyə uyğun olaraq həll edilməsi üçün müvafiq tapşırıqlar verib. Bəzi məsələlər yerindəcə həllini tapıb, digərləri isə araşdırılması üçün nəzarətə götürülüb.

Vətəndaşlar göstərilən diqqət və qayğıya görə Prezident İlham Əliyevə minnətdarlıqlarını bildiriblər. Qəbuldan sonra Yalçın Camalov rayon ərazisində salınmış intensiv meyvə bağlarına baş çəkib, müasir suvarma sistemlərinin quraşdırılması ilə tanış olub və fermerlərə dövlət dəstəyi barədə məlumat verib.