“Bayer” Almaniya çempionatını məğlub olmadan başa vurub

Futbol üzrə Almaniya çempionatının 34-cü turunun ev oyununda “Bayer” “Auqsburq”u 2:1 hesabı ilə məğlub edib.

Bu nəticə ilə “Bayer” Almaniya çempionatını 90 xalla məğlubiyyətsiz başa vurub. Komanda 34 matçda 28 qələbə qazanıb və 6 dəfə heç-heçə edib. Klub tarixdə ilk dəfə ölkə çempionatının qalibi olub.

“Bayer”ə qədər Almaniya çempionatında cəmi iki komanda məğlub olmamışdı – “Drezdner” bunu 1942/43 mövsümündə, “Dinamo Berlin” isə 1982/83 mövsümündə bacarmışdı.

Bu mövsüm Bayerin qarşıda hələ iki finalı var - mayın 22-də komanda Avropa Liqasında həlledici oyunu Dublində İtaliyanın “Atalanta”sına qarşı, mayın 25-də isə Almaniya kubokunda “Kayzerslautern”lə keçirəcək.