192 kənddə fövqəladə vəziyyət: 120 min nəfər işıqsız və susuz qaldı

Xerson vilayətində atəş nəticəsində “Novotroitskoye” 150 kV-luq yarımstansiyası sıradan çıxıb. Bu barədə bölgənin rəhbəri Vladimir Saldo Telegram kanalında məlumat verib.

Onun sözlərinə görə, 4 iyun saat 23:10-dan etibarən təxminən 120 min nəfər işıqsız və susuz qalıb. Bu insanlar 7 bələdiyyə dairəsində yerləşən 192 yaşayış məntəqəsində yaşayır.

Saldo bildirib ki, Genichesk, Novotroitsk, Ivanovka, Velikaya Lepetikha, eləcə də qismən Gornostayevka, Verxnerogachik və Nijneserogoz bələdiyyələrində elektrik xətlərinə ciddi ziyan dəyib.

Sosial obyektlər fövqəladə enerji mənbələrinə qoşulub və yerli hakimiyyət vəziyyəti nəzarətdə saxlayır.

Bundan əvvəl məlum olmuşdu ki, Xerson vilayətinin Genichesk dairəsində, o cümlədən Arabat oxunda və yaxın bölgələrdə elektrik enerjisinin qəza nəticəsində kəsilməsi baş verib. Düşmən pilotsuz uçuş aparatları bölgəyə hücum edib. Ərazidə ən azı üç partlayış baş verib və hava hücumundan müdafiə sistemi işə düşüb.

Ulusum.az