Amerikalı milyonerin həyat yoldaşı qətlə yetirildi – Sevgi üçbucağının qanlı sonu

Belçikada yaşayan amerikalı milyonçu Kris Delani evə qayıdarkən həyat yoldaşı Karmeli qan gölünün içində ölü vəziyyətdə tapıb. Qadın artıq nəfəs almırdı. Delani dərhal polisi çağırıb. Əvvəlcə hüquq-mühafizə orqanları hadisəni soyğun kimi qiymətləndiriblər, lakin sonradan məlum olub ki, qadın ərinin gizli eşq macərasının qurbanına çevrilib. Bu barədə "Lenta.ru" məlumat yayıb.

63 yaşlı Kris Delani "Goodyear" şin şirkətinin yüksək vəzifəli əməkdaşı kimi tanınır. O, 61 yaşlı həyat yoldaşı ilə birlikdə 2017-ci ildən Brüsseldəki dəbdəbəli yaşayış kompleksində yaşayırmış. 17 martda evə gələn Delani qadınını yerə yıxılmış, hərəkətsiz halda görüb. Fransız dilini bilməyən Kris nə baş verdiyini polislərə izah edə bilmədiyi üçün ilk olaraq belçikalı köməkçisi Qritə zəng edib. Məhz o, cinayəti hakimiyyət orqanlarına xəbər verib.

İlk ehtimal silahlı qarət olub. Müşahidə kameralarının görüntülərində maskalı bir şəxsin Karmelə bıçaqla hədə-qorxu gəldiyi və mənzilə daxil olduğu görünür. O, cütlüyə məxsus ümumi dəyəri on minlərlə avro olan üç cüt saatı oğurlayıb və qadına dörd bıçaq zərbəsi endirib.

Karmel Nyu-York mənşəli olduğundan, onun dəfni də məhz orada baş tutub. 2 aprel tarixində ailə üzvləri və yaxınlar kiçik bir kilsədə onun ruhu üçün dua ediblər. Krisə həmçinin Sidney, Dublin, Münhen və digər şəhərlərdən başsağlığı mesajları gəlib – onlar birlikdə bu şəhərlərdə olublar.

Hadisə artıq aydın bir soyğun kimi qəbul edilirdi ki, təhlükəsizliyi pozan bir ipucu istintaqın gedişatını dəyişdi. Aprelin əvvəlində Qritin adını açıqlamayan bir tanışı polisə yaxınlaşıb və bildirib ki, aralarındakı dostcasına söhbət zamanı Qrit Karmelin başına gələnlərin onun əli olduğunu dolayısı ilə etiraf edib. Polisin söhbətin məzmununu açıqlamamasına baxmayaraq, bu ipucu sayəsində gizli bir sirr açıldı: Qrit, Krisin məşuqəsi imiş!

İnformatora əsasən hərəkətə keçən polis, milyonçunun köməkçisinin evi və at saxladığı tövləni axtarıb. Məhz tövlədə – heyvanlar üçün nəzərdə tutulan hissənin arxasında – oğurlanan saatları tapıblar. 4 aprel tarixində Qrit saxlanılıb. Ona Karmelə qarşı evdə hazırlanmış silahla hücum etməkdə ittiham irəli sürülüb. Kris də dindirilib, lakin hələ ki, ona qarşı rəsmi ittiham yoxdur.

Qritin motivləri hələlik tam aydın deyil. Polis onun cinayəti qısqanclıq zəminində törədib-törətmədiyini dəqiqləşdirə bilməyib. Qeyd olunur ki, Qritin öz əri də var və yaxın keçmişdə döş xərçəngi səbəbilə cərrahi əməliyyat keçirib. O, hazırda dəmir barmaqlıqlar arxasında müalicəsini davam etdirir.

Delani cütlüyünün dörd övladı qalıb. Ailə dostu Ceyms Lafferti bildirib ki, gizli münasibətə baxmayaraq, Kris həqiqətən Karmeli sevirdi və onun başına belə bir iş gəlməsini heç istəməzdi. Doğru olanı isə istintaq göstərəcək, araşdırma davam edir.

Ulusum.az