Binəqədi rayonunda baş verən dəhşətli yanğından 10 il ötür

Bu gün, 19 may, Bakının Binəqədi rayonunda Azadlıq prospektində baş vermiş dəhşətli yanğından 10 il ötür.

16 mərtəbəli yaşayış binasında baş vermiş yanğın nəticəsində 15 nəfər həyatını itirib, onlardan 5-i uşaq idi. Ən kiçik uşağın cəmi 1,5 yaşı var idi.

Daha 64 nəfər müxtəlif dərəcəli yanıq və xəsarətlər alıb, zəhərli tüstüdən zəhərlənib. Qurbanların əksəriyyəti tüstüdən boğularaq ölüb. Alovun söndürülməsi 4 saat çəkib.

Yanğının səbəbi "Global Stone" MMC adlı tikinti şirkətinin rəhbərliyinin cinayətkar səhlənkarlığı olub. Şirkət bina üzlüyündə istifadə etdiyi poliuretan materialı özü istehsal edib. Mütəxəssislər bu materialın asan alışdığını dəfələrlə açıq şəkildə bildirsələr də, şirkət mənfəət xatirinə Bakının müxtəlif binalarını keyfiyyətsiz poliuretanla örtərək yüzlərlə insanın həyatını və təhlükəsizliyini təhlükə altına atıb.

Yanğından sonra paytaxtda təhlükəli üzlük materiallarının sökülməsinə başlanılıb və bu işə təkcə dövlət qurumları deyil, sakinlər də qoşulub.

✍️"Ulusum".az