Silikon vadisində Azərbaycan dilinin 2-ci Breyn Rinq oyunu EKSKLÜZİV FOTO

Silikon vadisində Azərbaycan dilinin 2-ci Breyn Rinq oyunu təşkil olunub.

Şimali Kaliforniya Azərbaycan Mədəniyyət təşkilatının dəstəyi, Nurlan Şükürlü və Ülvi Verdiyevin təşkilatçılığı ilə Azərbaycan dili və mədəniyyətinin yaşadılması və Amerika azərbaycanlıları arasında əlaqələrin gücləndirilməsi məqsədilə II Brain Ring yarışması keçirilib.

Tədbir Azərbaycan Respublikasının Dövlət Himninin səsləndirilməsi ilə başlayıb.
ULUSUM.az saytının ABŞ Bürosunun məlumatına əsasən, ötən il baş tutmuş turnirin uğurundan sonra fərqli yaş kateqoriyasına aid olan iştirakçılar və qonaqlar bu dəfəki oyuna daha böyük maraq göstəriblər.

Yarışmada iştirak edən 8 komanda zəngin intellektual bilikləri ilə diqqətləri cəlb edib. Fasilə müddətində istedadlı gəncimiz Cavid Hüseynlinin skripka ifası, Şimali Koliforniya azərbaycanlıları həvəskarlardan ibarət yeni yaradılmış "Sound of fire" musiqi qrupunun rəhbəri Anar Allahverdiyevin və onun qrupunun nağara ritm çıxışı yarışmaya rəng qatıb.

Komandalar arasında gedən qızğın mübarizə nəticəsində qalib "Billionaires" komandası olub. II yeri "Qaçaq Nəbi" komandası, III yeri isə "Silicon Valley Azərbaycan" komandası qazanıb. Qaliblər sertifikat və medallarla təltif olunmaqla yanaşı, birinci yerin sahibi "Billionaires" komandasına kubok və pul mükafatı da təqdim olunub.

Qeyd edək ki, Kaliforniyada keçirilən "Brain Ring" yarışması yerli azərbaycanlılar arasında dilimizi, mədəniyyətimizi, milli mənsubiyyətimizi tanıtmaqda mühüm platformadır.

Tofiq Ağayev
ULUSUM.az saytının ABŞ Bürosu.
[center]




[/center]