Fitnes zallarının qiyməti "ƏL YANDIRIR" - EKSKLÜZİV

İdman və düzgün qidalanmanı prioritet sayan və zərərli vərdişlərdən imtina edən müasir insanların çoxu üçün fəal sağlam həyat tərzi böyük əhəmiyyət kəsb edir.

İdmanın təkcə sağlamlığa deyil, insanın xarakterinə də müsbət təsir etdiyi heç kimdə şübhə doğurmur. Lakin bütün bunları həyata keçirmək üçün maliyyə və seçdiyimiz idman fitnesdirsə onun zalı lazımdır.

Şəhərin mərkəzində fitnes zallarının qiyməti neçəyədir?
Bu qiymətlər insanları qane edirmi?

Bununla bağlı ULUSUM.az saytı araşdırma edib. Hazırda şəhərin mərkəzində fitnes zallarının aylıq qiyməti 120 manatdan 1300 manata qədər dəyişir. VİP xidmətlər üçün daha baha qiymətə təkliflər də var.

Ən ucuz zallar "Nərımanov", "Elmlər" metrostansiyalarının yaxınlığında 120 manata tapmaq mümkündür. Təbii ki, bu qiymətə normal şəraiti olan zalları nəzərdə tuturuq.

Lakin qadınları da nəzərə almalıyıq, çünki onlar da idmanın müsbət tərəflərini nəzərə alaraq fitneslə məşğul olmaq istəyirlər. Ona görə xanımlar üçün şəhərin mərkəzi həm pristij baxımından, həm də digər mental və kultural dəyərlər baxımından uyğundur.

Amma fitnes biznesi ilə məşğul olan şəxslər də tələbatı görüb, əsas da gəlirin yüksək səviyyədə olduğunu anlayaraq qiymətləri aşağı salmırlar.

Məsələnin başqa tərəfi təklif olunan qiymətlər fərdi deyil, fərdi məşğul olmaq istəyənlər üçün göstərilən məbləğin üzərinə azı 50 faiz də əlavə olunur. Yəni, zalın minimum qiymət 120 manatdırsa, fərdi şəkildə 240 manat ola bilir.

Məsələ ilə bağlı fitnes üzrə məşqçi Samir Əliyev saytımıza "uçan" qiymətləri belə izah etdi:

“Hazırda fitnes dünyada ən çox populyar olan idman növüdür. Yaşından və cinsindən asılı olmayaraq hər kəsin bu idman növü ilə məşğul olması günümüzün reallıqlarına görə vacibdir. Qiymətlərin baha olmasının əsas səbəbi yüksək tələbatla bağlıdır. Bundan başqa, fitnes zalı şəhərin mərkəzində yerləşirsə təbii ki, icarə haqqının yüksək olması qiymətə bilavasitə təsir edir. Lakin biz bu idman növünün xeyrindən çox qiymətinə önəm veririk. Əslində çox möhtəşəm idman növüdür. Onu da qeyd edim ki, qiymətlər digər ölkələrlə müqayisədə eynidir”.

Əvvəllər idman dedikdə parklarda yürüş etmək, təbiət qoynunda qaçışla sağlamlığın təmənnasız təminatçısı nəzərdə tutulurdu. İndi isə bütün sahələrdə olduğu kimi, bu sahədə də müasirlik özünü qabarıq göstərir.. Artıq idmanımız da bahalaşıb.
Ağa Dadaşzadə