Elxan Şahinoğlu: "Paşinyan etirazlara seyrçi QALMAMALIDIR" FOTO EKSKLÜZİV

Azərbacanla Ermənistan arasında sərhədlərin delimitasiyasına dair əldə olunan razılaşmadan bəri Ermənistan müxalifəti ölkədə etiraz aksiyaları keçirir, yerli əhalini hakimiyyətə qarşı qaldırmaqdadır. Əslində, bu ölkədə nə baş verir? Müxalifət delimitasiya mövzusunda niyə bu qədər israrlıdır?

ULUSUM.az saytına özəl müsahibə verən Elxan Şahinoğlu məsələni belə şərh edib:

"Ermənistan müxalifətinin etirazları gözlənilən idi. Aydın idi ki, 4 kəndin Azərbaycana qaytarılması ilə bağlı qərar alınarkən, aydın idi ki, Nikol Paşinyan sərhədin müəyyənləşdirilməsinə başlamalıdır. Və burada radikallar arasında etiraz dalğalarının baş verməsi, hətta kilsənin də onlara qoşulacağı bəlli idi. Lakin düşünmürəm ki, Ermənistanda etirazlar kütləvi hal alsın, bu, mümkün deyil".

İrəvandakı aksiyaların hakimiyyəti devirəcək səviyyədə olmadığını bildirən Elxan Şahinoğlu Paşinyanın susqunluğuna diqqət çəkib:

"Ermənisanın Baş naziri susqundur. O, seçkilərdə xalqın dəstəyini aldığı üçün arxayındır. Bununla belə, Paşinyan hələ ki bu siyasətdən vaz keçmək niyyətində deyil".

Qeyd edək ki, radikal qüvvələr sərhəddə müəyyən təxribatlar törətməyə çalışırlar. Bu baxımdan Nikol üçün hərəkətə keçməyin vaxtıdır.

"Paşinyan polis və ordu gücünə də olsa, qısa vaxtda etirazların qarşısını almalıdır. Əgər baş verənlərə seyrçi mövqeyi sərgiləməkdə davam edərsə, o zaman əlbəttə ki etiraz dalğalarının böyüməsi də risk altında qalar. Ona görə də ciddi tədbirlər görülməlidir", -deyə E.Şahinoğlu əlavə edib.

Politoloq eyni zamanda qeyd edir ki, prinsip etibarı ilə proses qaydasındadır. Yəni sərhədlərin müəyyənləşməsi işləri davam etdirilir, sərhəddə dirəklərin sayı getdikcə artırılır.

"Radikalların hər hansı ciddi problem yarada biləcəyini zənn etmirəm".

Aymirə Ağamirova